Okadaki MLA Sengar den tangartem dak tai tongloktsür

New Delhi, August 13 (Agencies): Unnao nung tashiyim agi shi nung medemba tetsür tebu tepseba ken o nung BJP nung anentsüba MLA Kuldeep Sengar aser tangartem dak tai tongloktsüogo.
Mongulbarnü Delhi okadak kati Sengar den tangartem dak tai tongloktsü. Parnoki tetsürla tebu dak teka sangshiba aser 2018 indang Arms Act ka nung pa dak tai tongloktsüba atema okadaki iba mapa inyak.
Arishi küm 19 tain tetsürlai, June 4, 2017 nü Unnao nung BJP MLA Kuldeep Sengar aser tangartemi la dak tashiyim agi shi nung medem ta tai tonglokja lir.
Sengar-i tetuyuba agütsüba ama police-i tepuokdak tetsürla tebu dak kanga züka merenshiba sülen pa mozü kidang asü aser iba tatalokba sülen iba ken o CBI nem bushisüngdangtsü agütsü.
Allahabad High Court-i tetuyuba agütsüba nung ajemdaker April 13, 2018 nü MLA Sengar apu.
Taküm July 28 nü tetsürla, la atema okatsür aser la tetsü tanutsü nungertem mena aliba gari ka dak truck gari kati atsük aser idangji tetsürlar tetsü tanutsü anaprong asü aser la den okatsür kanga mejungi yirua liasü.
Iba lendong atalokba sülen bushisüngdang asüdang truck gari indang licence plate nübanger liasü aser iba ajanga iba ya tasa atonga inyakba mapa ka ta temulung malemer.
Iba lendong atalokba sülen anogo ka lir Uttar Pradesh Police-i truck driver aser cleaner na apu.