‘Okadaki onok sendok. Ochi obendang magütsü’ : Jyoti Singh’er tsüraburtem

New Delhi, December 18 (Agencies) : 2012 küm December ita aiür ka shi nung tashiyim agi raksatsür sülen asüba ken o nung tai tonglokja alir parnok nisung trok rongnung tanubosang Hokolbarnü Delhi High Court-i chioktsü obendang agütsüba sülen “Onok nem ochi obendang magütsü” ta asür Jyoti Singh tetsü Asha Devi-i ashi.
Tanü okadaki oshidang agütsüba tetezüji, tai tonglokja alisangji tang arishi küm 21 tain lir aser joko pa ‘special home’ nung ayutsü ozüngi memelar ta ashiba lir.
Iba nisung ya tesüiba küm asem tashi ‘special home’ nung yua liasü aser December 20, 2015 sülenbo pa iba kidang nungi chioktsüla aser pa atema rehabilitation plan ka inyakang, ta tanü High Court-i oshidang agütsü.
Iba oshidang agütsüba sülen High Court kima nung asür Jyoti tetsüi ashiba agi, “Onoki merangdangaka, kanga dang mapa tamajung inyaker ka chiokogo. Okadaki onok sendokogo. Onoki ochi obendang mangu.”
“Onok kanga jashir, saka onoki kechi inyaktettsü? Asenok ajak okadak tetuyuba ajanga alenbanga lir. Asenok dang nung okadak tulutiba” ta tetsürla tebu Badrinath-ia osangbener dang ashi.
“Tanü arishi küm 2 tain kinü tanurtem dak nisungtemi shi nung tashiyim agi raksatsür, saka item nisungtemji tanur asübayong ta ser chioker. Onok rara manentsü. Ozü atema okatsürtem dang nungi shisatsü agiba sülen onoki teinyaktsü tim inyaktsü” ta paisa ashi.
December 16, 2012 nü arishi küm 23 tain medical student Jyoti Singh tebur troki shi nung tashiyim agi raksatsü aser iba tatalokba sülen anogo 13 lir külen la Singapore mozüki ka nung asü. Iba mapang Jyoti tashiyim agi raksatsürtem rongnung tanubosangji arishi küm 17 tain ka liasü.
Jyoti dak tashiyim mapa inyakertem rongnung nisung ka tepuokdak yua lia soseta asü aser tanüngba pezüji tasüba temerenshi agüja lir. Parnok rongnung tanubosangji küm asem reform home nung ayutsü atema okadaki tetuyuba agüja liasü.