Okatsürtem teyari

Alima asünungji, putepa alitsü merangaka aiben nisungtem rongnung putepa melitettsüsa ataloker. Idangji tangatettep kati marutetra okadak ken o benoktsüsa akümer. Ajisüaka, nübortem asoshi timtem kaji okadak obendanger tsüngdang keno benoktsübaji temela masü, kechiyong ken o benoker jagi temzüng ozüng meteta alitsüla. Ibayongji, tangar teyari magii peisasa okadak keno benoktsü melaa liaka, okatsür (advocate) bushitsüsa akümer. Ajisüaka, ano makamaitertem atema okatsür bushia okadak ken o benoktsübajia temela masü kechiyong okatsür nemji taa agütsütsüsa adoktsü. Ano, shisabolutsü kaji okatsür bushia okadak ken o benokaka obendangji kodang angutsüar memetet, anungji obendang shitak anguyonga menur obendang agütsüra kecha nüngdak ka mali akümer. Iba timtem jagi tanü asen lima nung sensaker aser tilartem, shirnoki okatsür nübo maatetter parnok aika jepaka nüktzü malu temulung shiranga lir. Item rongnung karbo takaba ajak tangari rakzüka bener orr talidaka maka senzüa alitsüa akok, ano karbo kidang nungi balazüka yokba alitsüa akok, karbo tashiyim agi taküm raksatsür timtema alitsüa akok ano karbo nisung tepsetba ken o asütsüa akok. Aji oda, tulur aser takar-taiter aliba lima asünungji, maparen aika nung sensaker aser tilartem metena liaka temetendak maka aiben okadak nungi taitsüba angur mesüra mapang talangka obendang mangur. Aji oda, ken o karbo nisung sür külen dang obendang agütsüba ataloka alitsü. Ibayongji, tanü nisung aika temeten liaka, temeten bushitsü temulung moulutet ola madoki lir. Item timtemji reprangteta tanübo okatsürtemi telok tentetter okadak ken o benoka jembitsü nüngdakba purtem nem teyari angati agütsütsü tentetba mapaji alima nung mapa tajungtem rongnung tajungtiba asütsü. Alima nung mapa tajungtibaji pei temeten asoshi ola madoktettertem yariba aser parnok melen ola adoktsütsübaji asütsü. Ibajibo Tsüngrem chir mapa lir. Iba mapaji tanü Nagaland nunga State Legal Services Authority purtemi inyaker. Parnok ya okatsürtem lir aser parnoki nübortem tonga oagi maparen tapu balala nung temzüng ozüng tsütsü pei temeten aser teinyaktsü indang tangatetba agütsür. Ibaji dang masü saka parnoki makamaitertem shirnoki pei temeten indang mejembitetter aser okatsürtem nübo maatetter, item ama tilar aser sensakertem bushia oagi parnok tenüng nung okadak ken o benoka jembitsür. Ano, parnoki inyakba tajung kaji, kokra, mangatettepi aliba telok ana tsüngda tiyongi irr ken o angadanger aser okadak masü saka peisasa tangatettep nung ken o tembangtsüsa lenmang bushitsür. Aji oda, kümsa küm okadak ken o tepdaka yur temetena mangu aser tajangzüka mangu ta alitsübaji meinperongtsü aser takoksa ulura lir, anungji akok tashi tangatettep nung yakta ken o tembangadoktsü asoshi okatsürtem telok yagi inyaker. Aji oda, nisung ajak ozüng kübok liromedema litettsü atema nüngdakbaji mapang shitak nung ochi obendang agütsütetba aser ngutetba mapa ya asütsü. Alima asünungji ozüng raksar alitsü, ajisüaka ozüng raksartem anema okadak nungi yakta dang ochi obendang agütsüra, ozüng raksartemji pei mapa dak alang temerenshi angutsü aser iba jagi nisung ajak tan asütsü. Koba lima südir süaka okadak nungi yakta keno angadanger obendang agütsütetba limaji terenlok aser tesüngjem lima asütsü. Ajisüaka, asen lima nungbo obendang yakta magütsütetter asünungji, ozüng raksartemang jangratema alir aser pei tajangzük angutsü atema ozüng raksatsübaji kecha arendaka mebilemer. Aji oda, ozüng shitak mebenshirtemang sademsadema litetba aser obendang mapang shitak nung magütsütetba ajanga tamajungerang tasü taitba akümba tiaji Nagaland nung alirtem ajak asoshi kanga tia majung asütsü. Iba ama mapang ka nung okatsürtemi nübortem dang maparen tapu balala nung temzüng ozüng aser pei temeten angatetdakja senzüba dang masü saka nübo aser shisatsü angati agüja okadak jembitsütsü mulungtetba mapaji nübortem asoshi tenla tulu asütsü.