OKM-i Mid Day Meal (MDM) onük atema sangoktsür

Dimapur, March 13 (TYO) : Mid Day Meal (MDM) jang koba sorkar ajanga school tanurtem nem agütsür, iba dak sendakba ken o maparen nung Ongpangkong Kaketshir Mungdang (OKM) mendenti-i nübur ajak den tangatetba kar lemsateper, ta sangdong ka ajanga metetdaktsü.
SDEO Mkg kübok aliba school-tem nem agütsütsü aruba jang school tanurtem-i mechitettsüsa agütsüba puteta tangateteba tajung nung Mokokchung Town Lanur Telongjem-i (MTLT) tim maparen inyakba asoshi OKM-i MTLT nungiter aser tarutsü nunga MTLT-i iba ama tim mapatong inyaktsü imla-a atar, ta OKM sangdong nung shia lir.
“SDEO Mkg kübok aliba school tanurtem nem iba ama chiyongtsü chidaktsütsüsa inyakba ya shir-i inyak, ya kanga dang tamashi mapa ta OKM-i aitsür. Iba ama mapa inyakba ya teinyaker shir südir süaka yimjak nung tatok meshitsüla” ta sangdong nungsa metetdaktsü.
OKM-isa, “Tarutsü nungbo iba ama maparen ya mataloktsü asoshi osettsüset aser chiyongtsütem agizüka mayudangsa reprangshima ayutsüla. Tarutsü nungbo iba ama maparen shilua mataloktsü asoshi teinyaker ajaki meteta alitsüla, iba den külemi iba ama tim masüba maparen atemabo OKM-i aibelener anema ola adoktsü nungnanga mali,” ta metetdaktsü.