OKM-i Survival Mokokchung maparen nungiter

Mokokchung, Nov 28 (TYO): Ao Kaketshir Mungdang (AKM) ajanga asen lika-lim merüktettsü aser tongtibangsa bendanger senso kuli tejangja makar shirnok dang, “Illegal Bangladeshi Immigrants” ta ajar, parnok nungi pilaa jenbua alitsü tangatetba nung koba maparen 2007 küm nungi “Survival Mokokchung” inyaka arudaki, iba mapatong nung Ongpangkong Kaketshir Mungdang-ia AKM nüngita yaritsü, ta OKM tir Sp. R. Sünep Pongen aser tongtizülur Sp. Lendilong nati sangdong ka ajanga metetdaktsü.
“Survival Mokokchung maparen inyakba ajanga asen lima menena aliba, tang koda süngjema lir, iba ya asen nübur asoshi tajangzük ulura ta OKM-i züngshir”, ta parnokisa ashi. Iba den külemi ano iba maparen ya tali tajungtiba nung takok ngua aotsü asoshi nübur ajaki AKM maparen nungitsü asoshi OKM-isa tayongzükba ka agütsü.
Mokokchung nung iba “Survival Mokokchung” sentong ajanga shishilembaba nung temelenshi jenti adokogo, kechiaser iba sentong ajanga bendanger (IBIs) ket nung shishilembaba sota alibatem, asen lanur zünger mapa teinyaktsü maongka menguteti alirtem aika iba maongka tajung nguteta, tanübo tesem aisü nung tejakleni aoba angur, ta parnokisa shisem.
Mokokchung town nung Survival Mokokchung mapatong ajanga temelenshi bener arubaji asen kini dang masü, saka tanga kinia hau ta agizüka parnokia benshitsü meranger, atangji “ibai asen kin asoshi dang masü saka nübur ajak asoshi temoatsü mapa ka lir”, ta OKM-isa AKM nem tenüng agütsüba olen ka lemsatep.
Iba mapatong ya ano tali temaba jenjang nung takok nguteta aotsü asoshi Mokokchung town aser temeküt aliba jila ajak nung nuburtemi, “iba ya asen lima wazüka aser kümzüka ayuba maparen ka ta angateta ajaki nungittsü mapang tongja tongogo”, ta OKM-isa ayimoktsü.
“Tang tashi nung AKM-i Survival Mokokchung mapatong balala inyaka aruba nung OKM-i akokba lenmang ajak nung yaritepa arudaki, ano tarutsü mapangtem nunga iba mapatong dak sentakba ajak nung OKM-i maneni AKM nungittsü”, ta kasa sangdong nungsa metetdaktsü.