Okram Ibobi Singh anema tanabuba ken o benokogo

Imphal, Metsüremi 28 (Agencies): Vigilance aser anti-corruption department police station-i taoba Manipur chief minister Okram Ibobi Singh aser taoba Loktak Development Authority (LDA) ketdangser anema LDA ochimashi ken o dak sendakba nung ken o ka benokogo.
Keno o koba Küptoknü benoka liasü iba ajanga ashiba agi, aibelen ya 2008 Luroi (August) nungi 2009 Mongputeni (October) tsüngda menaba lir.
Tanga ketdangser ana ya taoba LDA project director Ch. Gojendro Singh aser Th. Ibobi Singh lir.
Okram Ibobi Singh ya iba mapang nung LDA mendenbuba liasü. LDA ya sorkar agency ka lir koba ajanga Loktak terenlok atema inyaker aser yimya agi chief minister ya iba agency mendenbuba asür.
Par asem ya IPC aser Prevention of Corruption Act, 1988 kübok section balala nung sübokrem agiba, ashioktsüba aser nisung tepsettsü merangba amala ken o nung aitsüogo.
Taoba küm BJP-i aniba teloki sorkar kümtetba sülen taoba CM anem tang agi ken o tanabuba benokogo.
Taoba küm Imphal police station nung, sen crore aika ochimeshi amshiba dak sendakba nung Singh aser taoba secretary asem aser taoba Manipur Development Agency (MDA project director anema ken o ka benokba sülen, Rongjui (September) nung Manipur High Court-i Okram Ibobi Singh nem bail agüja liasü.
MDA ochi mashi ken o bushisüngdanga aliba mapang ka nung tang tanabuba ken o ya benokogo. Iba ken o ya Deputy superintendent of police, vigilance and anti-corruption department, Leena Yumnam-i bushisüngdangdar.
Keno benokaka tang tashi nung shinga pua mali, ta ketdangser sangdong ka ajanga metetdaktsü.
Osang ajanga ashiba agi, tanabuba ken o ya Loktak lake cleaning project dak sendaka lir. Iba project nunga ya LDA-i K Pro Infra Works Pvt Ltd nem sen crore 244 agüja liasü.