Ola adokang !

Nagaland angh P.B.Acharya-i yakanü Sumi (Sema) nunger kaketshirtem lokti senden ka nung jembidang, lenmang yanglutsübaji yimten mapa, anungji yimsüsürtemi inyaktsüla ta metetdaktsübaji state nung tematiba yimsüsüri yimsüsürtem mapa nung temulung machiba o ka kaketshirtem nem angatetdaktsünüa metetdaktsüogo ta angatetter. Ano paisa kaketshirtem dang nenok lenirtem tajung lir aser government-a lir saka timi yimsüsüba kong ali (?) ta dena asüngdangba jagi kaketshirtem mulungjang nung tasüngdangba tuluka enoktsüogo. MP mesüra MLA shiai pei constituency nung yimtsüng kabosa pei yim ama kümer (adopt) anepalutsü linük nung sentong lateta lir, saka Nagaland nungbo iba ama inyakba osangji mangashir. MP aser MLA shia küm nung pei pei constituency nung pei mulungba terenlok mapa inyaktsü asoshi sen crore anana angur aser ano küm nung state nem sen crore 1500 agütsür. Item senji kongi aoer ta tangari masü saka governor-iang asüngdangtsüsa akümbaji Naga nunger kaketshirtem aser lanurtem asoshi tayongzükba tuluka asütsü. Tang ya Nagaland tatar senden nung opposition mali, anungji shingaia shinga tai maputsü aser anema jembiteptsübaji lenmang mali. Iba jagi aremer maremtet governor-i ola adoker asütsü. Pa ola adokba nükjidongji yimsüsürtemi timi yimsü masüba aser ochimashiba mapatem anema kaketshir aser lanurtemi ola adokdaktsüner. Iba jagi P.B.Acharyai Nagaland shirangba tashidak shitak putetogo ta bilemer. Nagaland nung gari lenmanga junga meyanglutet timatemba ya aiben asenoki yimsüsürtem dang aija jembir. Ajisüaka, jungjunga bilemdangra asenoki asenok jajatsü lenmang yangluba mapa ya asen mapa masü amai bilemba agi, teyanglutsürtemi meyanglutsür aser yangluyonga mashimashika yanglur toktsür. Napaleon Bornaparte-i ashir, alima ya nisung tamajungertemi raksar masü saka nisung tajungertemi tamajung anema ola madokba agi raksar. Ibaji asenok ajaki hau ta asütsüsa tanü asen lima nung atalokdagi. Koba lima nung südir süang, senso ka mapaji pei lima tamajung nungi kümzüktsü aser topur junga ayutsübaji lir. Akhidangbo pei lima kümzüktsübaji tsükchir ket nungi kümzüktsü asoshi dang liasü saka tanü tensa pei lima kümzüktsübaji ochimashiba mapatem nungi kümzüktsübaji asütsü. Aji oda, tanü tensa asenok tsükchirji ochimashiba mapatem ya lir. Iba tsükchir den raradang asenoki yimsüsür mesüra ketdangsertem anema masü saka ochimashi mapatem anema ola adoka raratsüla. Aiben asenoki pei lima ochimashiba tsükchir ket nungi kümzüknü dang, asenoki ochimashi mapa anema masü saka ochimashisang anema nokdaker amai bilema inyaker. Iba jagi ochimashi anema raraba tongpang nung asenok tamakok angur. Atangji, ochimashi tongpang nung ola adoka nokdaktsübaji temela masü, kechiyong ochishirtemiang ochimashi anema nokdaktettsü. Ajisüaka, tang amai senso shingaia ola madok yimten tashi amshirtem nem pei sünütsü südaktsü nungbo, tanü ola madoker ajunga ya asüngbo alar akümtsü. Atangji, tanü ola madokertem teimbaka tanüa alar jenjang nung lir, iba jagi ola madoktetter. Pei lima renloktsü asoshi senbo teimba teimba endoker saka terenlokmong maka, lenmang majung, mozü kidang taneptsü mangur, light tashi agi meperir, küm shia tanurtem admision fee aser tuition fee magütsütet kangshir, lanur tazünger aser mazüngertem nem mapa inyaktsü lenmang mesayutetter saka ola madoktetter. Asenok ya kechi agi araka ayu ? Kechi agi alen ? Kechi agi agi tebang nembangtsür ola madoktetter ? Shibai kechi agi alizük ? Asenokbo pei temetena mejembitettsüsa ya kechi ? Joko, tangar maitsüli saka asenoki ochimashi mapatem anema ola madoktetba ajanga pei lima nung pei nümadanga melitettsüsa akümba tia ya khen jungjunga bilemdangdi aser senso ka ama ochimashir anema masü saka ochimashi mapatem anema ola adokdi.