Ola madokba takoksa

Nagaland nung alir Naga nunger aser tzü mopong ajak junger, anungji Nagaland ya telinütsüka aser tereprangnütsüka asütsüla. Ajisüaka, ajak tajung ser nung telinütsü aser tereprangnütsü maket kümdaktsüba tai aser temenenji asenoki tamajung aser meshitak anema ola madokba ajanga lir. Kodang telok nung telemtetba agitsüba mapang asenoki ola madoklir, ola madokba tetezüji tangari ashibaji asenokia shitaka ta agizüker ta sayur. Iba amaji, kodang asen lima nung meshitak atalokba mapatem anema asenoki ola madoklir, meshitaki inyakba mapatemji asüyonga asenoki agizüker ta sayur. Tanü asen lima nung shingaia kecha marendaki ochimashi aser tim masüba mapatem inyakbaji tebushir aser tasüngdanger maliba agi shingaia shinga nüken metsübui sademsadema inyaker. Tanga lima nungbo yimsüsür aser tulur asüyonga meshitaki inyakra nübortemi ola adoka anema apusor, anungji yimsü tesüdak nung asüyonga tepuokdaki aier. Government nung ozüng amertema ozüng nung aliba ama shitak mapa küma inyaka otettsü asoshi nübortem ola aser teyari nüngdaker. Idangji, nübortemi ola adoka nungittsüla. Iba jagi dang ozüng amertemi asüyonga, obendangertemi asüyonga nübortemi aginüba ama shitak inyaktsü aser ochi obendang agütsütsü. Government inyakyim nung dang masü saka tanü asen loktiliba nunga aiben nisung tamajungertemi tashiyim agi mapa tamajung inyaker. Item nisung tamajungertemi office aser ki tashi tonga aruagi amokmerena tamakangtsü kanga ketdangsertem tsübudakja inyaker. Ajisüaka, ibaji anema asenoki ola madoker, kechiyong ibaji asen dak ataloker masü. Ano, talisa tanü asüng Nagaland dena tesem aika nung teburtemi tashiyim agi tetsürtem taküm raksatsüba angashir. Ajisüaka, ibaji asen kinunger, asen kidong, asen yimer, asen tzükong mesüra asen kin dak ataloker mesüra asenoki mangu aser mangashi ama toktsür. Shitakba agibo, nisung kari tashiyim agi tangar tsübudakja inyakba rakzükratemba mapaji shir kidang, koyimer mesüra koba kin dak atalokdir atalokang, ibaji asen dak ataloker ama shishia bilema asenoki anir iba ama mapa tamajung anema ola adoktsüla. Asenoki pi kidang atalokdang ola madokra, asüngbo kasaji asen kidang ataloktsü aser asen chirnurtem dak tanen maka atalokyonga aotsü. Asenoki tashiyim agi rakzükratemba mapatem anema ola madokba tetezüji asenoki rakzükratemer lima ka yanglur asütsü. Iba amaji, tanü tangar yimtsür mesüra tangar kintsür dak tashiyim agi taküm raksatsüsa atalokdang asenoki iba ama mapa tamajungji anema ola madokra asüngbo asen jala dak ataloktsüa akok. Asenoki aiben ochimashi mapatem agi tangar kar akoksatsüba angashidang ajemajema kazür, kechiyong ibaji asenok dak ataloker masü. Ajisüaka, kodang asenoki mapa tilaka nung danga süaka tim masüba mapa inyaka angudang, ibaji anema ola adokdir asenokji alima junga melenshidaktsür akümer. Aji oda, kaketshirtem maparen tapu balala nung tazüngi yokba maparentem nung asüyonga mesüra government mapatem nung shimokba yimya asüyonga , kodangsa tim mesüi inyakba ngudir, tanübo asen kidang aser kinungertem azüngtsüsa mesüra mapa inyaktsüsa malitsüa akok, saka asenoki tang aser tarutsü lanurtem asoshi bilema item tim mesüi inyakba mapatem anema ola adoktsüla. Tanü kechi maparentem nungsa shitak inyaka odagi, iba amai shitak inyakyonga aotsüsa tamalen purtem aikati pei nübo, rongsen aser shisatsü tenla tajung aika agüja lir. Item tenlatem jagi tanü lanurtem kecha metsükdaki pei dak alang jenjang tajung alangteta odagi. Tanü asenok alima nung aliba ya rongsen bendena chiajemer aotsü aruba masü saka Tsüngremer mulungba mapatem inyaka lir aotsü asoshi aruba lir. Iba nükjidongji tongteta litettsü atema , asenok ajak ya Tsügremer tongpang nung ochimashi aser tim masüba mapatem anema ola adoka nokdaker mitkar kaka asütsüla. Tamajung anema nokdakba tongpang nungbo asenoki ola adoktsü marendaktsüla. Iba jagi dang tang aser teti atema asen lima nung tamajungtemji akoktsü.