Ola madokba takoksa !

Yakanü Dimapur nung gari toudak nung apu ka chirepa nisung pezü asübaji government-i asenok asoshi mapang shitak nung mapa shitak meinyakba anema asenoki ola madoki yutsüba takoksa asütsü. Iba tatalokba ya tangar dang ashi nungbo tangari asenok meima bilemtsü melen kanga menütsütsü. Iba apu ya gari senzütsüla masüa ta government-ia 2015 küm metet aser mesenzütsü metetdaktsü. Ajisüaka, iba lenmang ya nübortem asoshi kanga tongtibang lenmang ka aser iba apu paidoker apu ajanga orr alir yimtaklirtem senzütsü lenmang maka, anungji apu nung senzütsüji lendonga ta putetli, government-i iba melena teti atema masüyonga apu tasenba meyangludang senzüa atatsü atema lenmang tasen ka lapoktsür apuji shibanga toktsütsüla asü. Ajisüaka, Nagaland government-ji Naga nunger mesük nungji, government-ia tekümdangtsü o shir yutsüba dak alaka iba apu melena lenmang tasen ka melapoktsüi odang jajadaktsü aser nübortemia tetsübua metsübu aser shisaa mebului ola madoki yakanep tashi iba apu nungji jajaogo. Iba kasa  apu mesük mashi mapang ka nung chireptsüsa Nagaland nung apu aika alitsü. Item rongnung anogo shia yimsüsür aser tulurtem ajanga süiba apu ka Kohima aser Dimapur na tsüngda lir aser Dimapur nunga Nagarjan len aliba apu, ISBT anasa aliba Dhansari apu tasenba, Hotel Tragopan kima nungi tenzükba apu ( flyover)-tem yabo yakanü gari toudak nung chirepba amato mashi mapang ka nung chireptsüsa anokzür aser yin ajak kateta adoka lir  aser ano  apu den mataka  arua ki asür aser lenmang yangluba angur. Shiba südir nisung asübaji ajak atema kanga takoksa, saka lendong nunga Tsüngrem taochi ka angubaji anogo shia Naga nunger taintem jajabajibo toktsür, school tanurtem jajaba lenmang nung apu chirepba lendong nung Naga nungerbo kata masübaji kechi tesüngmangtsü taochi ta bilema Tsüngrem temeim bilemtetdi. Ano, asüng ser yanü tang amato government-ia merepranger aser nübortemia ola madoker ta lira, yakanü chirepba amato, ashiko, asenok toudak nung apu chireptsü. Iba mapangjibo minister-ba mesüra engineer-baer kibonga toudak nung apuji chireptsüa akok. Iba nükla nung public meyong apu, lenmang aser kiojen yangluba yabo kanga kümdanga aser kanga junga yanglutsüla. Ashiko, asenoki asen mapa nung ochimashi tilaka agi nübortem ashiokja tajangzük agiba jagi asenokang lendong ajurutsüa akok. Aji oda, iba yanglusang contractor-sanger kibongang ajanga ooya alidang apuji chirep nungbo koda (?) ta bilema item mapaji inyaktsüla. Ajissüaka, asenoki government mapa inyakdang tajangzük talila agitsü arishia inyaker, idangji lisem tamajung, long tanük, yin tamajung, cement agi matu ki tululu talanglang yamglua doktsür. Ibaji Secretariat, Directorate aser district nung govt office-tem asütsüa akok, Mesüra ibaji Chief Secretary mesüra D.C-baer kiang asütsüa akok. Item kitemjibo kodang chireptsüar memetetba tia ka nung lir  saka asenok shisamebulur, kechiyong asenok nükjidongbo mapa inyakba nungji tajangzük alitsüla aser ita sen mapang shitak angutsüla. Aji oda, kisürtemi lisem, long aser yin tamajung amshia ki yanglua anguayonga asenoki ola madoker, kechiyong iba jagi contractor, Director, Secretary, Engineer aser Minister-ba jashitsü aser parnoki asenoki parnokang arishir amai bilemtsü, anungji parnok nemji mapa shitak meinyakyonga nübortemi (kiburtemi) tenük amur tajangzük agidaktsür. Aji oda, Naga nunger sepaitembo khaitepi ao nunga prangpong nung injang malitsüa akok aser mi tepsepi ao nungi mi tepsepba gari nung tzü malitsüa akok. Ajisüaka, shinga ola madoktsüla, kechiyong yimsüsür aser tulurtem jashitsü . Aji oda, National aser State Highway nung gari ana metsüiteptet, kilentsü mali, lenka lenküpbok arem ayiptettsür labour mali aser black top-bo long malem ali nung dang apu apua otsür yutsü, saka nübortemi ola madoker, kechiyong contractor, engineer, minister aser MLA-ba tagitsü madoktsü ! Item lenmangtem nungji asenok lendong ajurupet ajurur aser gari yangluang matem senotsü lalur. Yamaji yangluba kidang aser apu nung asenok lia lendong ataloktsü saka Naga nungertembo ola madoktsüla. Ibaji kecha tesüngmangtsü mali, asenok ano ‘Independent’ mangu !