Ola madokba ya Modi indang hadir tasen ka: Nitish Kumar

Patna (Bihar), October 25 (Agencies): Bihar nung chief minister asembenren inyaktsü atema toktepsang aser BJP anema teloktep party lenir Nitish Kumar-i Haryana nung Dalit tanur ana tepsetba dak sentakba nung Ato kilonser Narendra Modi aitsüogo.
Taruba anogo troknü nung assembly election nüboyim sentong aika nung jembitsü alisang Ato kilonser Narendra Modi aija Bihar Chief Minister Nitish Kumar-i twitter jembiogo.
Election tembangba sülenbo Ato kilonser majurutettsü ta shia Kumar-i, “Bihar nüburtemi chichiba Modi metettsü aser ajurutsü asoshi maongka tajung nguogo, kechiyong election tembangba sülenbo pa ajurutsü tasak asütsü,” ta ashi.
BJP-i yimsüsüba state Haryana nung Dalit tanur ana mi agi rongseta südaktsüba onük nung Modi-i ola madokba atema aija Kumar-i twitter ajanga, “Jilushi aiba, temesüzükba o jembiba aser mejangjaba osang amshiba nung Modi matoksatsü aser tang pa indang hadir tasenbaji tebendang lia ola madokba lir,” ta ashi.
Kumar-isa, “Onük ajak nung maongka metoktsüi jembir aser twitter ajanga jembir ka, Modi-i linük indang onüktem nung ojang kata mejembiba aser nübur indang mebilembaji tesüngmangtsüka,” ta ashi.
Lok Sabha election nung nangzükbatem Ato kilonseri mataloktsüba atema-a Kumar-i aitsüogo.
“Pai nangzükbatem atema kecha mejembir aser metetsümonga black money, aluyimertem indang MSP, lanurtem nem mapa agütsütsü, Bihar atema maongka balaka densema pai aika amatokogo,” ta Kumar-i ashi.
Tan ita tetenzüklen Bihar nung nüboyim sentong ka nung jembidang Ato kilonser Modi-i Dadri bo metetshi ajisüaka Tir Pranab-i jembiba o lepshia, Hindu aser Muslim nunger tsüngda meraratsüla saka longjemer sensak tia anema raratsüla, ta ashi.
Iba sülen anogo ka lir Modi-i, Dadri nung atalokbaji tia maka tatalokba ka lir, ta jembia liasü.