Ola-osübo kasa dang saka tangatettsü balala

~ L. Kika Pongener.

Asen Ao oshi ya sensaker ta karibo ashir, ano oshi tarok meteter aikati Ao oshi ya takar ta ocet züluba züngshiogo. Ni oshi-oben tarok metetba nisüng ka masü, ni Ao oshi nung ano ‘O’ tarok aika meteta mali, anungji ni angazüktsü kanga meranger. Tir Yimyim nung Aor oshi-oben tarok metetertemi mapang shia ‘O’ taroktem aser temesüktep olong sernung tetezü balala, ano ola-osu kasa sernung tetezü balala, itemji bendena zülur adokba kanga tajangzük ngua züngogo, aser item nungjagi memetetjemi aliba aika angazükogo. Tir Yimyim olemsabang nung ni khen khen ocet züludanga Ao nung zülumen (spelling) shitakbaji koba (?) talisa ASLB-i tuyuba aser laishiba nung zülua aliba nungi repranga zülutsü meranger. Tir Yimyim olemsabang nung asen Aor lennir tajung kati ocet zülurtemi zülumen aser olong shitak masü aibelena zülubatem bendener metongshija züluba ni kanga pelaseta agizük, aser pai metongshitsüba amaji nia zülutsü meranger. Asenok ajaki angatettsübaji aseni zülubaji dang shitak ta bilema zülura, saka tangar den liromemedemra, talisa ASLB-i tuyuba ama mesui balaka zülura, ocet azüngertemi aseni kechi shinur ajibo angateter, saka zülumen aser olong meshitakba jagi tzüratema masü azünger. Anungji akokba tashi ocet zülur ajaki zülumen ya ASLB-i tuyuba ama aser laishiba nung zülua aliba den medemdanga zülura kanga ajungtsü. Ao oshi nung olong temesüktep kasa dang saka tetezü balala angatetba aika dang lir. Ano kasa olong ser ola-osu balala adokba agi tetezü balala angatetba-a aika dang lir.
Ni iba ocet nung ola-osubo kasa dang, saka zülumen nung ‘O’ aser ‘U’ balala bendanga züluba agi olong ana tsüngda nungji tetezü balala angatetba, ‘Mongdang’ & ‘Mungdang’ anaji bendanga lemsatepnur. Aiben iba olong ana ya züludang ‘O’ aser ‘U’ ya aikati mebendangi zülur. Kodang ‘O’ enoka ‘Mongdang’ ta züludir tetezü balaka angateter, aser ano kodang ‘U’ enoka ‘Mungdang’ ta züludir tetezü tanga ka angateter. Kodang ‘Mongdang’ ta sudir yim mongdang aliba, yimer ajunga süngpo nungi poti tashi yim salang (Panchayat Hall) nung adenshir yim mongdang (Meeting) aliba. Tatishitsü agi, ano Langpangkong Senso Telongjem anogo ana-asem sentong yanglur yim ka nung adenshir ‘mongdang’ lokti senden aliba. Iba mongdang yabo anogo mapang ka atakteter nubur asoshi rongdak tongtipang teinyaktsü maparen kar atema ‘Mongdang’ lokti senden ka aliba dang ajar. Ajisuaka, kodang ‘Mungdang’ ta sudir iba yabo lokti senden (Meeting) ka aliba masü, saka temaba sabang ka, telok-tentet ishika asütsü akok mesura aika asütsü akok, item lokti-tentetji longjemer ‘Mungdang’ (Association) ka kümteta ayuba, iba ‘Sabang’ dangji ajar. Aor arogo noklang ka-ser tenem dak tali longjemer mungdang ka ‘Ao Baptist Arogo Mungdang’ (ABAM) ta kümteta ayuba, Aor arogo ajak nungi tetsürtem telok tentet ‘Arogotzür’ ajunga longjemer mungdang ka kümteta ayuba “Ao Baptist Arogo Tetsür Mungdang’ (ABTM), Aotsür watsü telok yimtsüng shia nungi longjemer mungdang ka kümteta ayuba ‘Aotsür Watsü Mungdang’ (AWM), Aor kaketshirtem yimtsüng shia nungi longjemer mungdang ka kümteta ayuba ‘Ao Kaketshir Mungdang’ (AKM). Anungji kodang ‘Mongdang’ ta sudir iba ya yim mongdang (Meeting) ka mapang tataktet tatsüka sentepa alitsü aser ibaji temerbo senshitsü. Ajisuaka, kodang ‘Mungdang’ ta sudir yabo temaba sabang ka, telok-tentet kar longjemer ‘Mungdang’ ka kümteta ayuba (Association) dang ajar. Koba telok longjemer iba ‘Mungdang’ ya tenteta yudir, item telok ajungaji awashia acha-ayangtsü, timyimi azüoka liromedema longjema alitsü aser mapang kar nung mepetmesu adokdang iba mungdangdi yagi angadanger telemtetba agutsütsü. Ano iba den kasa Aor yim shia nung ‘Senso Mungdang’ ayur. Yimtsüng ka nung kin-kidong telemsa aika alitsü akok, aser item kin-kidong shia nungi teshimtet nubo agi shilang alanger ‘Putu Menden’ (Tatar Salang) ayur. Iba ‘Putu Menden’ dakji yimtsüng ka yimsusuba bangdak tashi ajak lir. Iba Putu Menden nungji kin-kidong shia pei tata shilang alanga achir. Yimtsüng ka nung iba ‘Putu Menden’ kupok aliba nutsüng-nubu ajunga dang ‘Senso’ ta ajar. Iba senso nungji arok kasa temeden ka nung longjemer ‘Mungdang’ ka ayur, iba dangji ‘Senso Mungdang’ ta ajar. Iba ‘Senso Mungdang’ lokti senden Aor yim teimba ka nung küm asem nung khen bendang semer nung prokshia alir senso ajunga kanga metsüngareta temzüng agi khangtepa adenshir süngküm shibanger mongdang alir. Anungji iba nungji tangatettsü kanga tongtipang kaji, koba yim nung ‘Putu Menden’ shilang alanga achiba ‘Tatar Salang’ lir, iba ama yimtsüng nungji dang ‘Senso Mungdang’-ji ayur, kechiyong ‘Senso Mungdang’ ya asen Aor sobaliba nung tetezü tulu aketba sabang ka lir. Ao lima nungi pilar Jila balala nung Aor yim küma liaka, koba nung shilang alanga achiba ‘Putu Menden’ (Tatar Salang) maka, oda ‘Committee’ ka shimteter yimsusuba menden ka tenteta ayur, iba ama yim nungbo ‘Senso Mungdang’-ji mayur. Aor senso tebur ka kodang nubojunga küm ter-pongu (15 yrs) tema tain kümdir süngpoi aitsü. Ajiser, süngpoi aiba anogo nungjagi pa ‘Senso’ nungji züngsem ka akümer. Aor sobaliba nung, nisüng ka kong süngpoi ia ‘Senso’ kümdir pa iba yimer senso asütsü. Anungji England, America, Assam, India, Jila balala, oda alima tatem tashi nung oa liaka, pa kong süngpoi ai iba yimer sensoji asütsü. Ajisuaka, pai tanga linük, tanga yimtsüng ka nung ‘Senso’ agira pa mezüng süngpoi ia senso akümba yimtsüng nungjagi senso temeden agientsüsa akümtsü, kechiyong Aor sobaliba agi senso ana (Dual Citizenship) memelar ta angazüka aru. Iba ocet ya ni angazüka aruba ama züluogo, anungji aibelen kar lira meteta alirtemi metongshitsüra ni pelashishia agizüktsü.