– I. Zülu Pongen, Mongsenbai.
Old Age Pension ya kanga tain tetsür aser tebur asa tao nung kecha teyari makar sorkar mapa nung melidanger arshia alir nem sorkari temeim sayua tantsü tambu dang nungi alima temoatsü meshia aser akhüm agütsüba temaitsü sayua sorkari department ka bener arua item welfare mapa acha-ayanga anepalua nübor ajak, tetezü nüngdakba nisungtem tongtettsüsa District office tashi lemsatsür welfare mapa lenmang balala lemsar agüja arudagi. Aji oda old age pension ya 2014 küm tashibo agütsüogo. Ibai ita shia angutsü aliba bendener küm nung khen agütsür, saka 2015 küm atemabo tanü tashi mengui ali nungji ya khen anepalua department-i temulong agütsü nungbo ajungtsü ta shidanger. Küm nung khen dang angur asü nung koba ita nung angur aji yongysaseta atar, ashiko nisung karbo iba sen angutsü yongyaseta atar mengui süadoker alitsü südi, ano karbo teyarir tajung mali Khristmas benjung iba sen agi dang süoshi, chiyongtsü alitsü yongyaseta ataba süitemdaktsüogo südi, ya koda tesasatsü. Anungji concern department ajanga sorkar dang sanction meshia tekeratiba nung anepalua agütsütsü mepishir. Kechiaser social welfare department ji iba amala anepalutsü department ya ayuba lir.
Item department shia nung ketdangser minister yua lir sürnung mapang shitak nung old age pension ya magütsütetra alimai bilemer aser ashir, iba sen ya minister-i achi alitsü, mesüra mapa makoker südi ta jembir, aser nemnemer. Iba sen ya state süali, mesüra central scheme süaka department ali tashibo sanctionji maneni alitsü tim, yamaji mesütetra iba welfare department ya akaba tetezü maka.
Ano Annapurana rice yabo leni maor tantsür tambur dang masü, küm nung kanga tain mesüaka pei sasa inyaka melitetba, oli ora mesütetba nisung nembo iba ama purana jang ya agütsür. Aser ibaibo pei sasa tabeni marutetter asü nungji sorkari item amala Anna purana agirtembo ki tonga bener arutsütsüsa sorkar order agüja lir ta angazüker.
Iba jang ya joko küm anashi mangur. Iba jang ya teyari maker atema asünungji küm piyong nung khen nung masü, ita shia agütsütet nungbo kanga tajungba süla ta bilemer. Sorkari koba scheme tajung bener arua yutsüogo, ajibo tang teinyakdak ketdangsür minister anir department nung alir tulur ajaki timtem malidaktsüi timtemer nisungtemji kümzüka ayutsüla. Item nisungtem nem tim tagütsütsü aliba magütsüi parnok süadokera asenok ketdangsür sentsüh tulu asütsü anungji yakta anepalutsütsü imlaa mepishir.
You must be logged in to post a comment Login