Old Khatkhati road nung aliba Ballu ayong indang apu semzükogo

Dimapur, Chiteni/July 05 (TYO): Old Khatkhati road nung aliba Ballu ayong ajanga yangluba apu tasenba Nagaland PWD Minister, Tongpang Ozukum-i Yangtepnü semzüktsüogo.
Nagaland aser Assam sendaktepba meter 30 talang apu ya Government of India-i Ministry of Road Transport & Highways ajanga Inter State Connectivity (ISC) scheme kübok yanglu.
District nung nüngdakba aputem yanglutsü asoshi state sorkar dak tashi peria mali asünung, state sorkari central sorkar den nüngdakba senotsü teyari agütsütsü asoshi jembishinü südagi, ta Minister-isa ashi.
Iba apu ya tang aliba sorkar mesüra pai ketdangsüa yangluba mesüaka tia maka timtem kar danga ajurura iba atema PDA sorkar aser pa tenüng tamajung agitsü, ta paisa shisem.
Iba apu indang jembidang, iba apu nem “Friendship Bridge (over Balu River)” ta tenüng agütsütsüla, ta pai ashi aser iba apu ajanga Assam aser Nagaland nung aliba nüburtem tali ajangzüktsü aser talisa tanurtem state ka nungi kati ayong ajanga school-i aortem ajangzükba den külemi shishilembaba nunga state ana tsüngta sendaktepa nüburtem ka küma longjemdaktsütsü, ta shisem.
Paisa iba apu semzüktsüba sentong nung jembiba mapang, central sorkar aser Road Transport & Highways Minister, Nitin Gadkari-i iba apu yanglutsü atema nüngdakba senotsü teyari agütsüba asoshia pelaba shisem. Iba apu yanglutsü asoshi pai melenzüksang Minister-i sentongtem tenzükba asoshia pai bilemteta jembi.
Developmental project ajak mapang shidak nung PDA sorkari renemtsü merangtsü aser iba atema sorkari contractor tem den senden kaogo, ta Minister Tongpang-isa shisem.
Iba project indang technical report agütsüba mapang, iba apu yangluba nung sen indokba ajak agi lakh 1381.14 liasü, aser iba apu kisüng masü saka lenmang tasazük kilometer 2.5 densema yanglushi, ta Er. Limadongdang Jamir, Chief Engineer (R&B)-i metetdaktsü.
Burma Camp nung NH 39 nungi Balu River (2.5 Km) lenmang den meter 30 talang RCC apu ya Mongputeni/October 22, 2015 nungi tenzüka yanglu aser ita 24 tashi nung renemtsü sentong liasü, saka Assam nungi maparen kar nung menuba ajanga Aami/June 10, 2018 nungang renem.