Old Peren nung Girl Child Day mungogo

Dimapur, Mongputeni/October 11 (TYO): October 11 nü Peren nung International Day of Girl Child anogo mungogo. Iba setong ya “Little Girls with Dreams become Women with Vision” omen nung ajemdaker Peren District Administration aser Beti Bachao Beti Padhao(BBBP)kübok District Level Centre for Women-MSK aser Sakhi-One Stop senteper Peren Town Hall nung ayongzüka mungogo. Iba sentong nung SDO (Civil), Rahul Mali (IAS) tetushi tesemdanger liasü.
Sentong nung o jembidang SDO (C), Rahul Mali(IAS)-i ashiba agi, lokti tentet ajak nung telemtetba agiba lokti nung tetsürtem nem kasa jenjang agütsütsüla. Legislature nung tetsür medenra tetsürtem nem tashi agütsütsü tamakoktsü. Paisa, tetsürtem terenlok asoshi sobaliba inyakyimtem nung temelenshi bener arutsüla, ta ashi. Rahul Mali-isa sentong nung dena aliba tetsürtem dang lokti nung tatishitsü aketba taküm ka ta sayuteta, jakteter aliba senso ka ama lokti nung parnok jenjang meraksai alitsü ajungshi.
Tanü iba sentong nung Jepdak o jembiba tetoktepba; “Empowering a girl is the best way to develop our nation” onük nung ajemdaker Debate tetoktepba aser hygiene and healthcare, empowering of a girl, save a girl child onük nung ajemdaker Painting tetoktepba kaa liasü.
Sakhi-One Stop Centre tir Akosi Khate lenisüba sentong agi aser Women Welfare Officer, MSK (BBBP), Heriateile-i lokti pelaa agizükba o jembi. Maneni Sakhi-One Stop Centre Counsellor, Grace-i tepela anküp o jembia liasü, ta DPRO & IA, Peren sangdong ka ajanga metetdaktsü.