Old Secretariat building kanga mejungi kümogo; Sorkar sentongtem nung AHODs aser HODs attendance reprangtsü

Kohima, April 18 (TYO): Kohima nung Congress office jakdang aliba Old Secretariat Complex mejungi kümogo aser iba nungji alirtem ajak ki toktsütsü tetuyuba agütsüogo.
Tang iba ki nung RMSA, Land Records & Survey Department, Taxes aser ECHS Polyclinic nungertem amenoka lir.
Hombarnü Nagaland Chief Secretary, Pankaj Kumar lenisüba nung AHODs aser HODs senden ka amendang iba osang metetdaktsü.
Senden nung Old Secretariat Building Allotment Committee-i power point presentation ka ajanga ki mejungi akümba osang metetdakja liasü.
1960s mapang Secretariat Building tejenba ya sen lakh 9.62 endoka yanglu. Iba kimung tasazükji 15000 square feet lir aser tang iba ki nung tsüngpang aser tongshitem tashi meiti akümba ajanga ki chireptsüsa kümogo, ta Committee-i osang metetdaktsü.
Iba nung ajemdaker senden nung adenertemi Old Secretariat Building nung alirtem ajak ki toktsütsü atema tetuyuba agütsütsü telemtetba agi.
Tanü senden nung Nagaland Chief Secretary-i AHODs aser HODs nunger sorkar sentongtem aser Assembly Sessions mapang madenba atema süoki ia bilemba olen ka metetdaktsü.
AHODs aser HODs-i Sorkar sentongtem aser Assembly Sessions nung madenba atema Chief Minister-ia pa indang office dangi iba onük atema shidi züluogo, ta Pankaj Kumar-i ashi.
Attendance atema ozüng balaka yanglua mali saka ketdangser kati pei teinyaktsü khuret angateta, Angh aser Chief Minister-i ayongba sentongtem, Independence Day aser Republic Day, den Assembly Session tem nung adentsüla. Iba dak sendakba jenjang tajungba maküm tashi, tang nungi AHODs aser HODs attendance mita reprangtsü, ta Chief Secretary-isa metetdaktsü.
Tanü senden nungsa Information Technology & Communication Commissioner & Secretary, KD Vizo-i state Secretariat nung Aadhaar-based biometric attendance system indang osang metetdaktsü.
North east state tem rongnung Nagaland Civil Secretariat nung Aadhaar system amenokba mezüngbuba amenokba atema tenüng tajung agir saka officers aser employees-i biometric machine takok ngua mamshir, ta KD Vizo-isa shisem.