Olemtep ajanga telungpur khuret koktettsüla : Ibobi

Imphal, February 25 (Agencies) : Manipur state nung telungpur indang khuret ya olemtep ajanga koktettsüla ta Chief minister Okram Ibobi Singh-i ashi.
Phungyar nungi Congress candidate Victor Keishing atema sentong ka nung jembidang, Ibobi-i ashiba agi, Manipur nung telungpur telok aika lir aser state indang khurettemji tangalen nungi aruba lennirtemi masü saka state nung aliba nübortemi dang koktettsüla.
Ano, Oinam nung Congress candidate, I Ibohalbi Singh atema nüboyimtsüba sentong ka nung chief minister-isa ashiba agi, “Manipur nung arua amunger centre nung BJP lennirtemi state tali angatettsü merangtsüla.”
“Manipur ya Assam mesüra Arunachal state ama masü ta ni nenok dang mepishia metetdaktsür. Arunachal nung telok ka toktsür oa tanga telok ka den lokteper sorkar aküm, ajisüaka iba amaji Manipur nungbo nenoki mapa meinyaktettsü ta ni nenok dang shinür” ta Ibobi-isa BJP lennirtem dang sangoktsü.
Ano külen, RTI cell nung convenor inyaka aliba BJP lennir tejen Hareshwor Goswami-i Hokolbarnü BJP toktsür Congress nung denogo.
Congress Bhavan nung Ibobi-i Goswami pela agizük aser pa adenba ajanga Congress tashi itshitsü ta chief minister-i ashi.
Goswami-i ashiba agi, pa ticket ka angutsü atema BJP toktsüba masü saka BJP nung tejak repranga inyakba anema party toktsütsü telemtetba agi.
“BJP nung ochimashi aika inyaker aser ibaji talisa ticket alemba maparen nung lir. Assembly elections nung ni Congress telok atema bendanga agüja inyaktsü” ta Goswami-isa metetdaktsü.