‘Olong Waitep’ Tebhong-II kaket sayaogo

Dr. Temsüwati (achijilen nungi tasembuba)-i “Olong Waitep” Tebhong-II kaket sayatsür külen kaket zülur, Aso Imsong (achiji nungi tanabuba) aser sentong nung tongti shilem agirtem noksa nung angur. Mokokchung, August 18, 2017 (Photo courtesy: Imrongkumba Aier)

Mokokchung, August 18 (TYO): Chuchuyimpang nunger Wb. Aso Imsong-i yangluba “Olong Waitep” Tebhong-II kaket Hokolbarnü yangi Hotel Metsüben, Mokokchung nung taoba Additional Development Commissioner, Dr. Temsüwati-i meraketa sayatsüogo.
Iba kaket saya sentong nung Ao Senden, Ao Senden Literature Board, Ao Kaketshir Mungdang, Ongpangkong Kaketshir Mungdang nungi ketdangsürtem aser medemertem arua shilem agia dena liasü.
Iba kaket ya tongtibangsa Ao kin kaketkenozülu aser oshioben wazüka ayuba den terenlok asoshi nükla yur züluba lir, ta kaket zülur, Aso Imsong-i ashi. Iba kaket ajanga lanurtemi Ao oshi aser ojang aika angazüktsü imlar, ta paisa shisem.
Kin ka tejakleni aotsü aser ajungkettsü asoshi nükmenji kanga tongtibang, anungji, nükmenji mamadoktsüla, ta tanü kaket sayatsür Dr. Temsüwati-i ashi.
Tanü Ao kini jembiba oshitemji bendena lanurtemi shisatsü aroka bushitsüla, kechiyong oshiji asen maitsü (identity) lir, ta paisa shisem.
Iba sentong nung Ao Senden tongti zülur, Wb. S Temsu Aier, ASLB mendenbuba, Prof A. Lanunungsang, ASLB tongti zülur, Wb. I Temjen Tzüdir nungertemi otep o tatsütsü jembia liasü. Iba sentong nung Chuchuyimpang Baptist Arogo Pastor, Rev. I. Wati Imsong den temoatsü meshia sarasademer tenzük aser MTBA Associate Pastor, Wb. Sentimeren den tenüngsang agüja sarasademer tembang.