Oltmans-i Paul melenzüka India’er tebur hockey coach akümer

New Delhi, July 25 (Agencies): Netherlands nunger Roelant Oltmans-i külem sensopur, Paul van Ass melenzüka India’er tebur hockey telok coach inyaktsü shimokba osang jangjaogo.
Küm 3 tejaklen nungi tenzüka India hockey den yaritepa arusang, arishi küm 61 tain Oltmans-i anir külen India’er hockey teloki sangküm, 2016 küm Rio de Janeiro nung asayatsü ayongba Olympic Games nung shilem agitsü.
Hockey India (HI) nung Tir, Narinder Batra aser Sports Authority of India (SAI) nung Director General, Injeti Srinivas nati yashi, Hokolbar nü senden ka amenba sülen Oltmans India hockey coach shimtsü telemtetba ya agi.
“Oltmans-i Rio Olympics metembang tashi India hockey coach inyaktsü metetdaktsüogo. Ajisüaka, Olympics sülena pai coach mendenji maneni abentsü asoshi onoki ajungshiogo,” ta Batra-i yashi osangbener den ajurutepdang metetdaktsü.
Paisa ashiba agi, Paul coach menden nungi anentsütsüsa akümba atema sasar saka India hockey jenjang tajungba kümdaktsütsü tangatetba nung yamaji inyaktsüsa aküm.
“Asenoki tejakleni mera agitsüla aser asen alizüng ajangzüktsü atema coach-tema melenshitsüsa akümer. Aji oda, coach tasenba kübok India hockey teloki Rio Olympics nung takok ngua shilem agitsü imlar,” ta pai ashi.