Olympic nung Manipur nunger

Asenok aikati memeteti alitsüa akok saka taküm 2016 küm Rio De Janeiro, Brazil nung alima kin ajunga sendena asayaba Olympic asayamong nung India tenüng nung Manipur nunger asayar trok tashi oagi shilem agia asayaogo. Ibaji asenok asoshibo tesüngmangtsüka lir. Atangji, parnoki takokbo mangu saka Manipur ama state tilaka nungi India tenüng nung nisung trok tashi oagi Olympic nung shilem agitetbaji Manipur asoshibo takok dang nungi tuluba aser asenok asoshia tayongzükba tuluka lir. Par trok rongnungji Mary Kom-bo maden saka labo tsüngtepba kija nung alima nung nüngtugu küma asayatetba agi Rajya sabha nung tatar kümogo. Ibajia tenükshitsüka lir. Iba amaji asen kidanger Manipur state nung asayartem tajung adoka Olympic aser Rajya sabha tashi tongtettsüsa asayatetba angudang asenok Nagaland nung alirtema merangteptsüla. Asenok Manipur nunger dang nungi tatsüba, tilaba aser tashimaitbabo masü. Aji oda, tar atsüba agi Olympic tonga masayatettsüka asübo Manipur nungertemiang metongtetla, mesüra sensakba agi mesüra alima tensa majungba agi asayar tajung madoktettsüka asübo Manipur nungertemang madokla. Ajisüaka, Manipur nunger dak aketba shisatsü tajung kaji, kechi mapa nung amdakdir amdakaka, iba mapa nungji ajak dang nungi tajungba inyaktettsü meranger. Parnok asoshi mapa tulu tila kecha mali, kechi inyakdir inyakaka taküm ajak bendanga agüja inyaktsüla. Iba jagi garia parnokisa tajungba yanglutetter, süa parnokisa tajungba arrtetter aser soruchioka parnokisa tajungba soruchioktetter. Ibayongji. Manipur nunger ta asüba kija agi tangari junger ta temulung lemtetadoker. Aji oda, Singh Workshop ta süra yangji mechanic tajung lir asütsü, Singh Tailor ta süra yangji Manipur nunger sü arür tajung alitsü, iba amaji Manipur Hotel ta zülua ngura yangji mechiyongbo ajanga mounütsü. Iba kasaji school nunga ongko subject-bo Manipur nunger tesayurtemi tajungba agitettsü. Aji oda, joko tanü asüngbo computer lima asünungji computer amshidak computer amshir tajungtemjibo Manipur nunger asütsü. Iba tenüngji parnok atema rongsen lir. Iba ama pei pei mapa nung meranga aser nendaknendaka tangar dang nungi tajungba asütsü meranga inyakba agi asayartema Olympic tashi tongtetter. Ashiko, football asaya nunga World Cup nung India  asayatetka asünunga asayar terka rongnung asempezükabo Manipur nunger asütsü. Ano, Manipur nung asayartem asoshi jangratemtsü kaji state governmenti saisapong nung kanga temulung agüja anepalur. Atangji, government tsütsüa ochimashi inyakba nung, ashiko, Nagaland dangbo Manipur-ang tamajungba asütsüa akok. Ajisüaka, kodang Manipur tenüng atutsü atema inyakdir, Manipur government-i kanga temulung agütsür. Ibayongji, terenlok mapa inyakba nunga noklangben agi Nagaland dangbo Manipur nung tajungba inyaker. Imphal yimdong nungbo ajem ka endoka alinunga shia arutettsü saka Kohima nungbo garitsüng ka endoka alinunga lishi agi pelepbanger mangutsü. Tepilaji aji lir. Iba kasaji asaya tsütsüa Manipur nung akaba sports school o Nagaland nung akaba sports school na medemdangtsü makok. Aji oda, Manipur state sorkari anir Manipur nungertemi asaya nung kanga temulung agütsüba ngua center sorkari Imphal nung Sports University lapoktsü sen dena agütsüogo. Asen kidanger iba ama saisapong nung dena alimai meteta akümdang, asenokbo Dimapur nunga süng state stadium ka küm ter nung merenemtetter. Kohima aser Mokokchung nung tangar jaoka asayatsüsa asayadak maka, anungji tanga district-tem indangbo jembitsüla masü. Iba ama tia nung lia, asenoki tawa Rio Olympic nung oa shilem agir Manipur nunger parnok trok nem nisung shia Manipur government-i sen lakh metsür pongngo agütsüba angur.  Ashiko, asenok asübo asayartem nemji lakh kaka agütsür lakh metsür pezüjibo miimzüka agila. Asenok asoshibo Olympic tonga asayatetba masatetbaji masü saka asayartem tenüng nung mesüra Olympic tenüng nung sen terabo miimzüka agitetter asü magitetter ta asüba tetoktepbajiang tuluba kümogo. Joko, iba ama shisatsü tamajungji toktsür, Nagaland nung yimsüsür aser lanurtem asoshi sen tama masü tenüng tajung tama bushitsü mapang tongogo.