Vargas, July 05 (Agencies): WBC Asian champion, Neeraj Goyat-i takok ngua, tang Venezuela kübok Vargas nung professional (Pro) tsüngtepertem asoshi ayongba Olympic Qualifying Tournament nung maneni toktepa shilem agitsü jenjang angur India tsüngteper kija kümogo.
Arishi küm 24 tain Neeraj-i points 3-0 agi Greece nunger Dimitrios Poulikos Tsagkrakos madak quarterfinal asaya koka tebur temang touzük seret 69 taret shilem semifinal asayatsü jenjang tanü, Mongolbar nü ajangzüka liasü.
Pai tan asayamong nung 2 buba jenjang abener, taoba European Championships silver medallist, Germany nunger Arajik Marutjan den semifinal asayatsü lemzüka lir.
Neeraj-i semifinal asayaji kokra, pai Rio Olympics nung shilem agitsü temeten angutsü.
Ano, pai iba asaya nung tamakok ajuruaka, semifinal asaya nung tamakok angur ana tsüngda asayaba tetoktepba nung takok ngura, Neeraj-i Olympics nung shilem agitsü temeten angutsü lenmang lapoka lir.
Ajisüaka, külem sensopur, Gaurav Bidhuri aser Dilbag Singh nati tanü tamakok ajuruba osang angazükogo
Moldova nunger Petru Ciobanu-i points 2-1 agi Dilbag temang touzük seret 81 taret shilem nung tsükdaktsü aser Ukraine nunger Maksym Fatych-i seret 52 taret tetenzükba asaya nung Gaurav madak takok angu.
You must be logged in to post a comment Login