Olympics asayaba tesemtem nung yi mamshidaktsütsü

July ita nungi tenzüka asayatsü aliba Tokyo 2020 Olympics anemertemi Tokyo Metropolitan Government building kima iba asayamung athitsü khanga longkak aitba noksa nung angur.

Aami/June 23, 2021 (Agencies): Olympics tenzüktsü anogo 30 anunga lia Tokyo Olympics organizers temi Bodhbarnü Olympics asayaba tesemtem nung yi meyokdaktsütsü atema telemtetba agiogo.

2020 küm asayatsü aliba asayamung koba wara poktetba ajanga thinena liasü, iba asayamung ayonga masayatsü atema Japan nungertemi anemaka asayamung ayongertemi renemdar. Bendanger asayar aser ketdangsürtem Japan nung adenshiba ajanga COVID-19 tashidak tali menatepyonga aotsü, ta Japan nungertemi shisabulua bilemer.

Media osang balala ajanga asayamung ayongertemi Olympic asayaba tesemtem nung yi jemdaktsütsü asoshi sentong yangludar ya sangdongba sülen iba anema nüburtemi ola adoka liasü.

“Mongintemi shisatsü agütsüba sülen asayamung ayongertemi venue balala nung yi ajemba aser ayokba nokdaktsü telemtetba agiogo,” ta Tokyo Olympics tir Seiko Hashimoto-i osangbenertem dang ashiba den sponsor Asahi Breweries-ia, yi mayoktsü atema telemtetba agiba mulunga agizükogo, ta ashi.

Health ketdangsürtemi Olympics asayaba tesem temekettem nung yi ayokba ajanga nüburtem tali anasabai arudaktsütsü, tashi agi jembiteptsü aser bar tem nung nüburtem aika meyokteptsü aser iba ajanga tashidak menatepyonga aotsü akok, ta ashiba sülen yi mayoktsü atema telemtetba agi.

Kasa mapang nung asayamung ayongertemi asaya reprangtsü atema nüburtem arudaktsütsü atema temelaba agütsütsü asoshi telemtetba agiba pusema jembiogo.

Asayamung ayongertemi Hombarnü ashiba agi, venue tem nung local tem 10,000 bo arudaktsütsü. Bendangertem nembo tenokdangba agüjatokogo.  “Terpranger dena asaya balala ayongzüka asayatsü asoshi tajungtiba renemshitsüji tajungba asütsü ta onoki telemtetba agi,” ta Hashimoto-i Mongolbarnü ashi.

“Auh asaya repranger medeni asayaba ajanga tashidak menatepa aoba nungi jenbotsü, saka tanga asayamungtem nunga tashidak nisung aika dak menatepyonga aoba mali,” ta Hashimoto-i ashi.

Organiser temi Bodhbarnü ashiba agi, aonung asaya reprangtsü asoshi nüburtem arudaktsütsü marudaktsütsü iba dak sendakba nung parnoki July 12 nü tashi nung telemtetba ka agitsü. Iba mapang tashi nung Tokyo aser tanga tesem kar nung tenokdangba agütsür aliba agintsü.

Wara pokteter aliba mapang asayamung tekümzükba kübok masayatettsü ta Japan nungertem aikati bilemer.

Kasa mapang nung Ugandan nunger delegate tem rongnung ka dak Japan tonga aruba sülen coronavirus tashidak potetba ajanga asayamung ayongertem atema tetsükdaktsü adokogo. Japan-i maru tsüngda tashidak tendangba mapang tashidak meputetba den vaccine-a agir liaka tashidak potetba ajanga tebilemtsü akar.