Olympics atema tetsür lasang kashishir telok shimogo

New Delhi, May 16 (Agencies): Brazil kübok Rio de Janeiro yimti nung taküm August ita 5 nü nungi tenzüka asayatsü ayongba Rio Olympics nung India tenüng nung shilem agidaktsütsü asoshi Deepika Kumari, Bombayla Devi aser Laxmirani Majhi nunger densemba India’er tetsür lasang toktepa kashishir telok    tanü, Hombar nü shimogo.
Par asemi taoba ita 3 tsüngda nung tetendangba sentong ishika nung takok ngua shilem agiba sülen tan Rio Olympics nung shilem agitsü atema shimer lir.
Deepika, Bombayla aser Laxmirani nungeri Rio Olympics nung team aser individual shilem nung India tenüng nung shilem agitsü.
Yaküm Copenhagen nung agiba World Championships nung takok ngua shilem agiba sülen India’er tetsür lasang toktepa kashishir teloki Rio Olympics nung shilem agitsü temeten ngua liasü.
Iba jenjang tajungji ajangzükba sülen taküm January ita nungi tenzüka, India kübok Jamshedpur, Delhi aser tatemsüa, Bengaluru nung agiba  terenemshitsü aser tetendangba sentongtem nung takok ngua shilem agiba sülen Archery Association of India (AAI)-i par asemji tan shimer lir.
Ano külen, Jayanta Talukdar, Atanu Das aser Mangal Singh Champia nunger densemba tebur teloka shima, Turkey kübok Antalya nung taruba June ita agitsü ayongba Third stage Archery World Cup nung India tenüng nung shilem agia Olympics nung shilem agitsü temeten angutsü asoshi toktepdaktsütsü lemtetba osang ka AAI-i metetdaktsüogo.