‘Om’ ashiba ajanga tamangba yimsü memelenshir: Ramdev

New Delhi, June 20 (Agencies): Yoga sentongtem nung ‘Om’ aser ‘’Surya Namaskar’ ta ashitsü atema tamangba lokti kari ashishiba mapang ka nung Yoga tesayur, Baba Ramdev-i, itemji ashiba ajanga nisung shinga tamangba yimsü memelenshir, ta ashi.
Deobarnü Rajpath nung yoga sentong ka nung jembidang Ramdev-i, “Ni Dubai-i ao aser yangji ni nisungtem dang ‘Om’ shia ‘surya namaskar’ shidaktsü. ‘Surya namaskar’ aidang ni Muslim nunger karbo meidaktsü aser parnok dang ‘ibaji aiba ajanga nenok tamangba yimsü melener süra ‘surya namaskar’ maitsüla’ ta ashi. Nisung shinga tamangba yimsü memelenshi. Yoga ya tamangba yimsü ka indang masü, saka secular lir,” ta ashi.
Ayush Ministry-i ayongzükba sentong nung ya Union minister tem- M Venkaiah Naidu, Arun Jaitley aser Babul Supriyo nunger den BJP MP tem- Meenakshi Lekhi, Manoj Tiwari aser Vijay Goel nungera densema liasü.
Paisa ashiba agi, “Yoga aidang nenoki ‘Amin’ aser ‘Om’ ta ashitsü akok ta ni ashi, ajisüaka nisung aika den Muslim nungera timbakati ‘Amin’ masü saka ‘Om’ ta ashi. ‘Om’ ta ashiba ajanga parnoki shisatsü tesünep angur ta ashi.”
Nisungtemi yoga ia tangara ajungshira India ya shisa takartem linük ka akümtsü aser Ram o Krishna den Swami Vivekananda aser Dayanand Saraswati nunger mangdang ataloktsü, ta paisa ashi.