Om Puri film tangokdang yiru

May 12, 2016 : Bollywood film actor tejen Om Puri-i pa film ka tangokdang tekettsü yiruba ajanga operation tila ka agitsüba lir, ta ashi.
“Ni Bhopal nung film ka atema asema aoba yimya ka tangokdang RCC atem nung lua alanga tekettsü tera tulu ka yiru. Iba zübu nung operation tila ka agitsüsa aküm. Ajisüaka ni anogo 10 tsüngda nung jungatoktsü,” ta pai ashi. Pa Disney production house nung ‘Baaghi’, ‘Captain America: Civil War’ aser ‘The Jungle Book’ film tem takok anguba benjung nunga denogo.
Tang tetangokdak film ya India, Pakistan aser London linüktem dak amendaker yanglurba lir, ta pai ashi saka film tenüngbo melemsatep.
Film director aser producer ji Dubai nungi lir aser iba film nung tembar ana….India nunger ka aser Pakistan nunger ka, indang otsü angutsü. Iba film otsü ya kanga tajung lir,” ta Om Puri-i ashi.
Taküm January ita nunga pai, Pakistan film ‘Actor In Law’ tangokzükogo, ta metetdakja liasü aser iba film ya pa atema Pakistan film nung mezüng süa shilem agiba lir.
Pai ‘The Jungle Book’ film nunga Bagheera atema pa ola agi shilem agitsüogo aser iba film ya alima rangben nung kanga takok nguogo. Pai ‘The Jungle Book’ Hindi oshi agi yangluba nung pa ola agi shilem agi.
Nüburtemi iba film tushia jembiba aika angashiogo, ajisüaka nibo iba film, English aser Hindi naprong, ano mereprangdang, ta pai ashi.
Pai, “English agi yangluba film nungjia actor tajung aikati shilem agija lir aser yangji Sir Ben Kingsley-i Bagheera ola adoktsü. Paia kanga junga shilem agitsür alitsü ta ni amanger kechiba süra pa ya actor tajung lir,” ta shisem.
Ano ibala mesükba film nung shilem aginer asü ta asüngdangdang pai, “Joko maginer, ajisüaka ni commentary kar asür aser nüburtemi kü ola meimer. Kü ola nüburtemi meimba angashia ni kanga pelar aser ibaji ajanga iba mapa kanga jangratema inyaker,” ta taküm Malayalam film ka aser ‘Ghayal Once Again’ film na nung shilem agisang Om Puri-i langzü.