Om Puri iba lima nungi pilaogo

Mumbai, January 06 (Agencies) : India cinema nung kanga nüngtugu actor Om Puri, Hokulbar anepdang par kidang sür lia angu. Pa arishi küm 66 liasü. Film industry nung par metemertemi ashiba ajanga, pa temolungjang mapa meinyaki asü.
Osang ajanga ashiba agi, Puri ya Brehostibar nikongtsütsü film tangokba tesem nungi kidangi arua liasü. Oakland Park nung aliba Lokhandwala tesem nung Om Puri-er ki lir, aser pa indang driver-i kishi tsüngtsüng aiben atem, saka telangzüba maliba ajanga aoksatepa liasü.
“Om Puri Cooper Hospital nung temang rangsa tendang. Nikongdang 3 ako meta Trishul-i bener aotsü aser 6 ako nung Oshiwara electric crematorium nung asüpila sentong agitsü” ta actor Shabana Azmi ajanga twitter nung metetdaktsü.
National award ana, Filmfare Award ana aser Lifetime Achievement Award angusang Om Puri ya film nung shilem agiba mapa nung küm 40 shi jangratema inyaka aru. Om Puri-i 2016 December ita nung pa indang tesüiba mapatem bilemteta twitter nung zülua lir. “Ne kecha nunga mesasar. Ni atema kasasa mapa tajung aika inyagogo. Kü tejak tangar ama tobur tajung masü, saka ni mapa junga inyakba ajanga ni kanga pelar,” ta pai zülua lir.
Padma Shri sempet agizüksang Puri ya Film and Television Institute of India aser National School of Drama nung zünga liasü aser iba mapang Naseeruddin Shah tena külem class nung azüng. October 18, 1950 küm Haryana nung Ambala tesem nung asosang, Om Puri Marathi film ‘Ghashiram Kotwal nung 1976 küm mezüngbuba shilem agia liasü.
Pai ‘Ardh Satya’, ‘Jaane Bhi Do Yaaro’, ‘Aakrosh’, ‘Mirch Masala’ aser anu film aika nung shilem agia lir. ‘Dabangg’, ‘Bajrangi Bhaijaan’ aser ‘Ghayal Once Again’ nunger film nung Puri tesüsa adoka lir.
2014 küm Steven Spielberg-i yangluba American comedy drama ‘The Hundred-Foot Journey’ nung Helen Mirren den külemi Om Puri-a shilem agia lir.
Hollywood nung ‘East is east’, ‘City of Joy’, ‘Gandhi’ aser ‘The Reluctant Fundamentalist’ aser Indian cinema nung shilem tajung agiba kisüng masü saka Pakistan aser British intang Tv nunga pai shilem agia lir. 2000 küm ‘East is East’ nung shilem junga agiba ajanga pa BAFTA Best Actor atema nominate süa liasü.
British cinema nung shilem tajung agiba ajanga Om Puri nem 2004 küm OBE konang tetushi agüja liasü.
Actor Annu Kapoor tenu Seema Kapoor den 1991 küm pa kibong aküm, saka kobi melii tena ita 8 dang lir pila. Iba sülen pai journalist Nandita Puri den 1993 küm kibong aküm. Om Puri aser Nandita tena tanur Ishaan lir. 2009 küm Nandita-i Om Puri indang taküm otsü ‘Unlikely Hero: The Story Of Om Puri’ kaket zülu. Iba kaket nung tesüiba mapang Om Puri dak atalokba otsütem tejangja zülutsüba ajanga pa kanga mepelai liasü.