Oman, Yemen nung yipru aitagi nüburtem timtemer

Salalah (Oman), Monupii 26 (Agencies) : Tanep yakta Arabian Peninsula nung ‘Mekunu’ ta ajaba yipru (cyclone) tesashi aitagi Oman aser Yemen nung timtem jenti bener arutsüogo aser tesem aika nung light abenba yizü raksatsü.
Ketdangsertemi ashiba agi, tang tashi nung nisung asem taküm samaogo aser tangar 40 samar bushidagi.
Oman nungbo yimti tulutem rongnung tasembuba, Salalah nung yipru arudang light kanga mejungi raksatsür nüburtem kanga timtemdagi aser tanep yakta Arabian tzüyim nungi tzülong nungteta adok.
Ano tzüsem tesashi nungteta adokba mapang tourist beach nung songtena aliba anüshi aika raksatsü aser lisem nung pelepoka yutsü. Oman nung arishi küm 12 tetsür chanu ka densema nisung asem süogo aser Socotra ta ajaba Yemen nunger asetkong nungia nisung 40 samar bushidagi. Police-i ashiba agi, idakji mezüngbuba yipru sashia ait.
Arabian Sea nung aliba asetkong tila ka nungi samartemji Yemen, India aser Sudan nungertem densema liasü aser parnok rongnungji karbo süogo südi, ta ketdangsertemi temulung malem bilemdagi.
Salalah yimti yimdong nung süngo tou tasüng nangdena liasü aser arokapatem aika awatsüng küma tzü agi metsüngbang. Electrical department nung inyakertemi kanga dang meranga light yanglushia liasü aser yimti tezülen Salalah International Airport anasa ayongnu takong aliba tesem ka tangbo ayongti küma tzü yimdar.