Omung Kumar, Sanjay Dutt na ‘Bhoomi’ nung külemi inyaktsü

Mumbai, November 20, 2016 : National award angusang film director Omung Kumar-i “Bhoomi” film atema Sanjay Dutt direct asütsü renema lir.
“Ni jangraba script ka bushia liasü. Ni shilem tajung ka aginüa liasü. “Bhoomi” ya temulung nung kongshitsü otsü lir. Iba film nung tebu aser jala na tesendaktep ostü angutsü,” ta Sanjay Dutt-i sangdong ka nung shia lir.
Iba film ya Bhushan Kumar-i aniba T-Series kübok Sandeep Singh aser Omung na meyong production house Legend Studios nung yanglutsü.
“Iba otsü yagi nüburtem kanga jangratema pelatsü aser pei menden nunga junga mementetti akümtsü,” ta Omung-i ashi.
Tesüiba mapang tem nung “Mary Kom” aser “Sarabjit” film tem yanglusang Omung-i, “”Bhoomi” ya temulung nung kongshiba aser mang ayangba drama ka asütsü. Iba drama ya tebu aser jala na tesendaktep indang otsü lir,” ta ashi.
T-series kibur Bhushan-i, Sanjay Dutt dak aketba sempet tajungji “Bhoomi” film nung tali jungkai adoka angutsü, ta ashi.
“Sanjay Dutt mapang talangka film nung shilem magidangi lir tan mezüngsua ‘Bhoomi’ nung shilem agitsü,” ta Singh-i ashi.
Iba film ya sangküm February ita nungi tenzüka Uttar Pradesh nung timba tangoktsü. Legend Studios kübok yangluba mezüngbuba film ji “Bhoomi” asütsü.