One Love Manchester concert ajanga sen million $3.5 aazük

June 6, 2017 (Agencies): Taoba ita Manchester nung Ariana kentenba sentong tembangba sülen bomb lendong nung takoksa ajururtem atema ‘One Love Manchester concert’ Deobarnü katsüba kanga takok ngua agiogo.
Iba kentenba sentong nung Grande, Katy Perry, Justin Bieber, The Black Eyed Peas, Coldplay aser ano tanga kentener aikati shilem agia liasü. Iba sentong ajanga sen moillion $3.49 azükba British Red Cross ajanga metetdaktsü.
British Red Cross’ puri achaayanga “We Love Manchester Emergency Fund” tendenba ajanga tang tashi nung sen million $13 aazükogo.
“Benefit concert ka atema jembi tenzükba mapang nungi ni iba tebilemdangba kanga jangratema bilem saka Ariana-i shilem agitettsü magutettsüar mejangjai liasü. Anogo ana lir külen lai kü dangi call asü aser lai langkabo inyaktsü nüngdaker ta ashi, aji ta mesüra asürtem amajok nung asü ama lai bilemer ta ashi,” ta Ariana manager, Scooter Braun-i ashi.
Iba kentenba sentong nung nisung 50,000 shi adenshia telungjem, taneptsü anguba aser tepela aonung ka kümdaktsü.
Grande-i shilem agiba mapang nung pai nüburtemi iba kentenba sentong nung arua shilem agiba atema tenüng sanga liasü. “Ni nenok ajak kanga meimer aser nenoki temeim aser telongjem sayuba ya tanga alimai kanga nungdaker,” ta lai ashi.
Arishi küm 23 tain US tsür kentener yagi iba sentong nung Miley Cyrus aser Black Eyed Peas purdena külemi shilem agi aser iba den külemi sentong nung ano Katy Perry, Coldplay, Robbie Williams, Liam Gallagher aser Justin Bieber nungeri dena shilem agi.
Iba kentenba sentong ya Old Trafford cricket ground nung aka aser tesem balala nung nisung million 14.5 shi-i repranga liasü.