One Man Judicial Inquiry Commission ka tentetogo

Dimapur, February 8 (TYO) : February 1, 2017 nü Cabinet senden nung lemtetba ama, Nagaland tesem balala nung tensa mejungi akümba aser talisa January 31, 2017 nü Dimapur nung nisung telok kati ozüng alema mapa inyakdang, nisung ana tepsetba aser yirutsüba tatalokbatem bushisüngdangtsü atema One Man Judicial Inquiry Commission ka tentetogo, ta Home Commissioner, Abhijit Sinha-i tanü sangdong ka nung metetdaktsü.
One Man Judicial Inquiry Commission ji District & Session Judge (Retired) L. N. Sema lir aser pai iba sangdong agütsüba sülen anogo 60 tsüngda bushisüngdang asüba osang agütsütsü, ta Home Commissioner-isa sangdong nung ashi.
Commission-i January 31, 2017 nü lendong ataloktsüsa kija/teloktemi mapa inyakba aser yaritepba bushisüngdangtsü.
JIC-isa Dimapur nung district administration/ police/ security agency temi tensa azüoktsü atema mapa inyakba, asür Khriesavizo Metha (Avizo) aser asür Bendangnungsang Longkumer na asüba den nisungtem yiruba aser parnok takoksa ajurutsüsa mapa inyakba telok indang bushisüngdangtsü, ta Home Commissioner sangdong nungsa shia lir.
Commission-i, iba tatalokba nung tim ta bilemba ken o tem bushiloktsü aser Commission ji Police Officers’ Mess, Chumukedima, Dimapur nung amenoktsü.
Commission nem Home Department, Government of Nagaland ajanga teyari aser nübo agüja yariteptsü, ta Home Commissioner-i sangdong nung shia lir.