OnePlus 5 phone India nung June 22 nü sayatsü

June 17, 2017 (Agencies): Taküm küm phone sayatsü alibatem rongnung OnePlus 5 smarth phone ya ajaki yongyaa ataba phone ka lir. Taoba küm OnePlus 3T aser OnePlus 3 phone tem India nung jenjang langa oset quality tajung agütsüba phone tajung rongnung densema liasü. Maneni taküm iba phone alima ajunga nung taruba hopta sayatsü aser India nunga anogo ana lir sayatsü.
OnePlus 5 phone nung Qualcomm Snapdragon 835 SoC den külemi 6GB aser 8GB Ram ta keta aliba phone tapu ana angutsü. 8GB RAM aketba smartphone India nung ayokba rongnung iba ya mezüngpur rongnung adentsü.
Company ajanga phone designbo Twitter nung sayaadokogo. Design tsütsü reprangdangra OnePlus 5 phone ya OnePlus 3T dang nungi tapuba aser talangba lir saka OnePlus 3T phone design dang nungi kecha balaka masü aser phone ponglanglen kasa fingerprint sensor keta angutsü.
OnePlus 5 nung Apple iPhone 7 Plus, LG G6 aser Honor 8 phonetem nung ama dual-camera keta lir aser ano camera nung ‘normal lens’ ka aser ‘telephoto lens’ ka ta keta lir. Maneni iPhone 7 Plus nung aliba ama iba phone nung ‘portrait mode images’ keta alitsü imlar.
Phone nung tzü aser awi mamongtsü koba tawa phone aika nung keter angur.
India nung OnePlus phone tem ayok tenzükba mapang nungi Amazon den longjemer yokdar aser iba phone tasenba yaa Amazon nungsa angutsü. Phone jenjangji sen 32,999 asütsü imlar aser 8GB RAM version yabo sen 37,999 asütsü imlar.
Company osang ajanga ashiba agi OnePlus 5 phone ya India nung June 22 nü sayatsü asoshi renema lir.