Ongken feet ana ser tesadang nung kiralongrartem maneni aremtsü

New Delhi, September 26 (Agencies): Line of Control (LoC) nung kiralongrartem merüktetba sentong ya nüngdak süra ano inyaktsü, ta Army Chief General Bipin Rawat-i Hombarnü ashi aser iba ajanga Pakistan nem tekümdangtsü osang tesashi ka agütsüogo.
Line of Control ajunga nung arrtsü alema kiralongrar den raratsü renema lir aser Indian Army temi kiralongrartem ya agizüka pei-pei leperi yoktsü renema lir, ta pai ashi.
Defence indang osangbener Shiv Aroor aser Rahul Singh nati züluba “India’s Most Fearless” kaket sayaba mapang jembidang mitkar tekolakbai item osang ya agütsü.
Iba kaket nung mitkartemi tensa tia tamajung nung ajangshibatem aser kiralongrar den raraba mapang ketdangsertemi shilem agiba otsü zülua lir.
Telungpurtem arrtsü alema aitba indang osangbener kati asüngdangba langzüdang Rawat-i, “Kiralongrartem maneni arrtsü alema aittsü merangtsü, kechiaser LoC nung parnok (kiralongrar) indang camp lir, saka onoka renema lir. Arrtsü alema aitertem onoki maneni agizüktsü aser feet ana ser tesadang lur aliba ali telungi maneni yoktsü,” ta ashi.
Jammu & Kashmir nung telungpurtemi taoba küm Army camp ka maka mitkar 19 tepsetba ajanga LoC nung kiralongrar meshitetba sentong ya taoba küm September 28-29 aonung agia liasü.
Kiralongrartem dak LoC alema orr amakba ya Army indang Special Force temi inyak. Indian Army temi iba sentong tenzükba mapang kiralongrar aika arrtsü alema India-i aittsü atatepa aliba tepset.
Iba ‘surgical strike’ ajanga kechi temelenshi bener arutsür, ta asüngdangba mapang Rawat-i, “Mapang arudang telemtetba agitsü asoshi asen linük tashi ita lir, ta iba ajanga osang agütsür,” ta langzü.