Online courses atema HRD Ministry-i ‘Swayam’ tenzüktsü

New Delhi, July 03 (Agencies): August 15, 2016 nü HRD Ministry-i Massive Open Online Courses (MOOC) atema sabang, ‘Swayam’ tenzüktsü sentong lir; iba sabang ajanga linük nung kaketshir crore 3 tashi nem course 2,000 dak tema agütsütsü.
Osang ajanga ashiba agi, iba project ya tenzüktsü atema maparen ajunga inyakdar aser taküm kümsa Ato kilonser, Narendra Modi-i iba project tenzüktsütsü sentong lir.
“Iba project atema maparen mazüngi inyakdar. Iba project ajanga shisaliok nung temelenshi tulu adoktsü, iba project ya August 15 nü Ato kilonseri tenzüktsütsü imlar,” ta HRD ministry ajanga ashi.
SWAYAM ya Information Technology sabang ka lir aser iba ya ajanga Massive Open Online Courses (MOOCs) agütsüba den külemi school level class 9-12 nungi Under Graduate aser Post Graduate tashi kaketshirtem nem subject balala aika nung shisaliok tajung agütsütsü.
Network kati yarisema course 2000 tenzüktsü aser ibaji ajanga mapang mashika nung aser tesem mashi ka nung nisung lakh 10-i iba network amshitettsü.
Iba scheme ajanga Ministry-i college aser university ajak nung high quality e-content angati agütsütsü benokogo.
“Iba ya ajanga linük nung kaketshir mashi katia SWAYAM nung tesayur tajungtemi agütsüba course agitettsü, talisa iba ya ajanga terenlok maliba tesemtem shisaliok jenjang junga akumtsü,” ta ketdangsertemi ashi.