Ono o Bono nungeri Lennon tenüng nung ‘Tapestry’ ka lapoktsü

July 30, 2015: New York nung Bhodbar nü, John Lennon bilemteta sü nung noksa enoka atakba (Tapestry) tulu ka lapoktsüogo. Iba lapokba sentong nung tanga nüngtugu nisung aika den pa kinüngtsü Yoko Ono aser U2 nungi ‘Bono and The Edge’ nunger dena liasü.

Iba noksa nung tzü telung nung jajaba rong wakong sentsü ka tzü tanen agi lungbanger angubaji Manhattan nüngtem nung yangluba lir. Iba noksa ya ‘Ellis Island National Museum of Immigration’ nung lapok. Iba noksa nung Lennon-i yimjung temaitsü sayua rong nung tanishir amai adoka lir.

2004 nung Lennon Beatles nungi pilar külen Ono-i acha ayanga pa kijia atenba ken ajanga Amnesty International nem US sen million pongu aatsüba atema tepela sayuba temaitsü iba noksa ya lapoktsüba lir.

Iba noksa ya Yoko Ono-i tebuba, asür John Lennon tenüng nung lapoktsü.

Iba senti noksa atema sen ajak Bono and The Edge aser music executive Jimmy Iovine nungeri enoktsü. Noksa ya Czech Republic nung asoba New York artist, Peter Sis-i design asüba lir. Iba sentong nung July 29 ya teti asoshi yimti nung ‘John Lennon day’ amungtsü ta metetdaktsüogo.

Bono iba sentong nung Lennon-i US senso agitsü merangdang timtem ajangshiba otsü shia liasü. Talang ka atsüteper külen Lennon nem 1975 küm US-i “Green Card” agüja. Iba noksa lapokba ya pa green card ngur küm 40 ajungba bilemtetmung mesüka lir.

Ono ya dang kensep tasen ka asoshi teinyakdak lir koba 2016 tashi nung sayatsü tebilemba lir aser lai ashiba agi, iba anogo tulu nung lai kanga ulua bilemer.

Lai, “Iba jenjang atongtsü asoshi John-i kanga merangang raraogo….pa yangi agizüktsü asoshi. Pai alima nung atalokbatem atema kanga bilemtsüa liasü aser America nung onoki inyaktetba ajanga alima nung temelenshi adoktsü, ta onoki meteta liasü,” ta ashi.

John Lennon ya 1980 küm New York nung injang agi kahset.