New Delhi, January 23 (Agencies): Taruba Assam assembly election dak sentakba nung Hokolbarnü Assam chief minister, Tarun Gogoi-i, state Congress-i vote agütsütsüpurtem dang par party nem vote agüjang mesüra regional party- Asom Gana Parishad nem vote agüjang, saka ‘communal’ party BJP nem vote tagütsü ta mepishitsü, ta metetdaktsü.
Tang maneni jenjang junga akümba party BJP ya tetokteper tuluba asütsü ta agizüka Gogoi-i, “Iba (election) ya rara tulu ka asütsü, kechiyong BJP-i tayongzükba agütsür,” ta ashi.
Ato kilonser Modi aija Gogoi-i, “Pai akhümket Ato kilonser ka ama mebenshir aser par sorkar ya longjema aliba tentet ka masü. RSS-i parnok nem tetuyuba agütsür,” ta ashi.
Press Club of India osangbenertem den jembidang Congress lenir tejen Gogoi-i, “Congress-i tangar den meloktepi tokteptsü aser menden melemsateptsü. Iba election ya tongbang tuluka asütsü,” ta ashi.
Tawa Modi-i Assam semdanga lokti senden ana nung jembiba dak sentakba nung Gogoi-i, “Pa Assam-i aru aser tamalen inyakertem nem tai tongloktsü. Ni kodanga Ato kilonser shinga yamaji mangu. Pa dang nungi tamalen inyaker Atal Bihari, Narasimha Rao mesüra Manmohan Singh ama pai Ato kilonser akhümket mayur. Tesüiba küm 60 tsüngda kecha meinyaktet ta aitsür süra, iba nungji Vajpayee (BJP lenir)-a densema lir,” ta ashi.
You must be logged in to post a comment Login