Onok NDA nung shilem ka lir: Conrad Sangma

New Delhi, Tsüklai/February 14 (Agencies): Meghalaya chief minister Conrad K Sangma-i Bodhbarnü ashiba agi, par pary National People’s Party (NPP) pur NDA nung shilem ka lir aser iba ajanga parnok National Democratic Alliance (NDA) nungi tugutsü tsübua aliba jangjashitsüogo.
“Onok NDA nung shilem ka lir aser iba alliance nungi tugutsüba asoshi tasüngdangba kecha madoker,” ta Conrad-i ashi. Rajya Sabha nung Citizenship Amendment Bill, 2016 (CAB) magizükba sülen ghona ishika lir New Delhi nung osangbenertem den sensaksemba mapang pai iba osang metetdakja liasü.
Hombarnü Sangma-i, sorkari Citizenship Amendment Bill agizükra par party NDA alliance nungi tuguadoktsü, ta amokmerena liasü. Iba osang sangdongba ajanga NDA kübok party tem sensena aküm, kechiyong anogo ana tejakdang Asom Gana Parishad (AGP) puri Assam nung BJP den tesendaktep malitsü telemtetba agir liasü.
Sangma-i iba telemtetba agiba ya political party balala den kaketshir lokti tentet aser tanga lokti tentet balalai pelashishia agizükogo.
“Iba bill anema nokdakba lokti ajak dang NESO puri kanga pelar. Kasa mapang nung Conrad Sangma lenisüba kübok Meghalaya sorkar-i anir inyakba ama northeast kübok state balala nung sorkar shirnokisa iba bill anema tasüita nokdakogo nenok ajak dang kanga pelar,” ta NESO mendenbuba Samuel Jyrwa-i ashi.
AASU chief advisor Samujjal Bhattacharya-i ashiba agi, “Meghalaya Chief Minister-i tasüita telemtetba agiba tenüng asangtsü tetemsü lir.”