Onok school azüngdang Ao oshi nung “Ki ka, kü ki ka,” ta azüng : B.S.Nganlang

Tuli, Jan. 15 (TYO): Onok yimtak tanur asüdang school nung Ao oshi nung dang zülutsü aser azüngtsü angazük, iba jagi asenok tesendaktep kanga junga lir, ta tanü Hokolbar nü yangi Tuli nung Langpangkong Kaketshir Mongdang (LKM) saisapong sentong nung football final asayaba aser takokertem nem sempet agütsüba mapang tetushi tejaoker Land Resources & Excise, Parliamentary Secretary, Wb. B.S.Nganlangi metetdaktsü.

“Onok tanur asüba mapang yimtak school azüngdang, Ao oshi nung dang Ki ka aser Kü ki ka ta azüng, iba nungjagi tenzüker onok kaketshisatsü angazük,” ta paisa ashi.

Aji oda, onok ya Aortemi sayutetba asünungji, onok dak aketba tajung aser majung ajak nungji Aor shilem lir asütsü ta Nagaland nung yimsüsür, Wb.Nganlangisa ashi.

“Onok lima nung sannüker, tesayur aser choir master ajak Aortem liasü, anungji tanü onok metetba ajak ya Aortemi sayuba lir,” ta paisa maneni Aortem dang pelaba olen ka metetdaktsü.

Talisa Langpangkong ya Phom nungertem den kidanger asünungji, lenmang nung timtem aser gari lendong ajuruba mapanga Langpangkong nungertemi ozü nübortem yariba onoki meteta lir ta paisa ashi.

Kasa sentong nung kaketshirtem dang tajungshi o ka ashidang, asayatsü sempet tajung aketba lanurtem aika lir asünungji, itemji alimai meteta tajung kümdaktsütsü asoshi Tuli ama nung asayaba tesem kanga junga yanglutsü nüngdaker ta B.S.Nganlangisa metetdaktsü.

Paisa Tuli paper-a tanaben lapoka otettsü atema akok tashi sorkaria inyaktsü aser ano kaketshirtem telongjemia maneni tejembitsü purtem den jembia aotsüla ta paisa tayongzükba ka agütsü.

Paisa lanurtem dang pei tsürabürtem koba tia nung lidir liaka, parnok dak nendaka melii peisasa tajung akümtsü merangtsüla ta tajungshi o ka ashi.

Tanep Hokolbar anepdang 7:00 ako nungi Tzudikong (Tuli paper mill) lenjem nungi Tuli lenden nung Aohadang Football asayadak tesem tashi Marathon asemtepba sentong ka Global Open University Nagaland  nung Director, Dr.Imotemsui tenzüktsü. Iba sentong nung asemteper ajak agi nisung 124 liasü. Iba marathon sentong ya Tuli Administration o LKM na longjemer ayongzükba liasü. Iba sentong nung Adhoc Town Committee. Tzudikong nung Secretary, Wb.L.Chubai pelaba o tatsüka jembi aser Tzudikong Town Baptist Arogo nung sannuker Rev. Temshii sarasadem.

Brehostibar aonunga LKM aser Tuli administration nati kentenba sentong tajung ka ayongzuka liasü.