Onok tepsetang, saka Myanmar-i meyipa teyok: Rohingya refugees

Hyderabad, August 18 (Agencies): Indian sorkari Rohingya refugee tem meyipa yoktsü osang sangdongba sülen Hyderabad yimti nung aliba Rohingya Muslim nunger 3, 800 shi kanga shisabulu tenzükogo, aser parnoki, Myanmar nung reshikangshi tia nung aliba dang nungibo parnoki iba yimti nungang süner, ta ashi.
Joko parnok yangi küm pongu shia lia arudar, aser parnoki tepsetdaktsütsü atema par linüki meyipa moner, ta ashi.
Osangbener den jembidang Abdul Raheem-i, “Onoki yangi lidaktsüba atema onoki India dang pelar. Sorkari onok meyipa yoktsü sentong lira, parnoki aji inyaktsü akok, ajisüaka onok meyipa yokba dang nungibo parnoki onok yangi ang tepsetba tajungba asütsü,” ta ashi.
Arishi küm 32, Raheem ya iba yimti nung pa kinüngtsü aser tanur asem den 2012 küm nungi lia arudar, aser pai, Myanmar nung parnok taküm aser kiojen kümzüka alitsü, ta parnok dang nangzük nung ang meyipa aotsü atema bilemdangtsü, ta ashi.
Ano refugee ka tenüng agi, Mohammad Younus-i, Buddhist nunger timba aliba Myanmar linük nung parnoki nangzükba ama meinyaker, ta ashi.
Paisa, “Tang agi tasembenbuba ni refugee ka kümogo. Parnoki kodanga nangzükba ama meinyaker,” ta ashi.
Arishi küm 63, Younus ya iba yimti nung pa kinüngtsü aser jala na den alir, aser pai osangbener dang pa dak injang tarak-a sayua liasü.
Paisa, “Myanmar Army temi kü dak injang khaloktsü, aser par linük nung treatment agitsü memelaba agi ni Bangladesh-i oa injangji temang nungi agiteta indok,” ta ashi.
India nung Jammu sülenbo Rohingyas nunger timba aliba yimtiji Hyderabad lir. Tang Jammu yimti nung Rohingya refugees 7,000 shi lir.
Refugees kibongtemji Hyderabad yimti kübok Balapur, Shaheen Nagar, Jalpally, Baba Nagar aser Pahadi Shareef tesemtem nung lidar.
India nung United Nations High Commissioner for Refugees (UNHCR) nung tenüng züluoka alir Rohingya nunger 16,000 lir, ajisüaka ajak agibo parnok 40,000 shi lir ta asadangtetogo.