Onoki aibelen kecha masü: India Kabbadi coach

Amritsar/Chandigarh, Tsüklai/February 18 (Agencies): India nunger kabbadi asayar 60 taoba Honibarnü Lahore nung ‘Kabaddi World Cup’ nung shilem agitsü asoshi ao aser parnok Hombarnü Attari-Wagah arrtsü adena meyipa aruogo. Parnok Pakistan-i ao India tenüng nung asayaba ajanga mepetmesü adok, koba World Kabaddi Federation-i magizüki liasü.
Union sports ministry aser Amateur Kabaddi Federation of India (AKFI)-ia, parnoki Pakistan nung oa asayatsü asoshi asayar shinga nema temelaba magütsü, ta shiogo.
India team coach Harprit Singh Baba-i India wako atsüketba aser asayartem jersey tesülen India ta zülur asayaba den parnok India tenüng nungi asayar ta ashiba ajanga mepetmesü tulu adok.
AKFI-i, Pakistan Federation dang asayartem indang jersey aser tracksuit nung India ta zülur asayatsü atema temelaba magütsütsü asüngdanga liasü
Parnok meyipa aruba sülen asayartemi kecha telangzüba magütsü, saka Harpreet Singh Baba-i ashiba agi, “onoki oaki oa asayaba ajanga kecha tai minyak. Aibelena aliba ngutetra temerenshi agizüktsü onok renema lir. Iba asayamung ya Guru Nanak sor küm 550 ajungba nüngtem nung asayaba liasü.”
“Onok kabbadi asayai aoba dang lir. Onok India tenüng nung mao aser Pakistan nunger ketdangsertemi agütsüba jersey semer onok asaya. Onok aibelena lira onoki temelaba magütsüi lila,” ta Baba-i ashi.
Asayartem indang asüngdangba mapang pai, “onok asayartem bendanger team nungia asayaogo. Onok pei sasep nung oa asaya. Asaya nung shilem magitsü asoshi tenokdangba agüja India nungi ketdangsertemi onok dangi call masü,” ta ashi.
India team dak alaka Australia, England, Germany, Iran, Azerbaijan, Sierra Leone, Kenya aser Canada nungi team tem arua iba asayamung shilem agiogo.