Onoki angati agi asayatsü: Zimbabwe cricketer

Chiteni/July 30, 2019 (Agencies): ICC asayamung tem nung shilem agitsü asoshi tenokdangba agütsüba sülen Zimbabwe nung cricketer asayartemi linük nung iba asaya mesamadaktsüi asayadaktsütsü mechi angati agi asayatsü mulunga lir aser taruba World Twenty20 Qualifiers nung shilem agitsü jangraba lemsatepogo.
ICC-i tawa Zimbabwe Cricket (ZC) nem tenokdangba agütsüogo. Sorkari iba asaya dak sendakba nung jushiba atema iba tenokdangba agütsü.
Tetsür T20 qualifiers August ita asayatsü renema lir aser tebur qualifier October ita asayatsü.
“Onok angati agi asayatsü. Onok taruba tinyaktsüji qualifier lir. Onoki angati agi dang asayatsü,” ta senior squad züngsem kati ESPNcricinfo dang ashi.
Senior national squads anaprongla nem taoba ita ana itasen agüja mali aser teburtem nem tawa Netherlands aser Ireland tour indang match fees agüja mali.
ICC-i tenokdangba agütsür aliba kübok bilateral series bo densema mali aser parnoki ayongzüka asayaba asayamung atema ICC-i match officials shimtsütsü. Ajisüaka ICC-i senotsü teyari magütsüibo parnoki asayamung kecha mayongzüktettsü.
FTP sangdong ka ajanga ashiba agi, Zimbabwe puri August ita Afghanistan aser October aser November ita West Indies ayongzüka asayatsü aser 2020 January ita India nung oa T20 series ka asayatsü sentong yanglua lir.
Kasa mapang nung Zimbabwe Cricket achaayangba interim committee-i parnok kübok inyakertem dang Brehostibarnü tashi nungbo mapai arutsü asoshi tetuyuba agütsüogo aser iba tetuyuba sülen manidakertem anem jenjang tapet agitsü ta metetdkatsüogo.
Zimbabwe national tetsür aser tebur team captain-i tawa Sports Minister Kirsty Coventry dangi akokba tashi takaratiba nung parnok asayadaktsütsü mepeshia züluogo.
Zimbabwe Cricket-i temzüng ozüng kübok manidakba atema iba ita tetezüklen International Cricket Council (ICC)-i parnok nem tenokdangba agütsü. ICC temzüng kübok linük sorkar nem teka amoka inyaksangshidatsütsü memelar.
Zimbabwe board züngsem tem government agency, Sports and Recreation Committee (SRC)-i mapa nungi anentsü, koba articles 2.4 (c) aser (d) nung aibelenba ka liasü.
ICC-i Zimbabwe Cricket Board züngsem tem dang ita asem tsüngda office kümteta inyaksangshiyonga aotsü tetuyuba agütsüogo aser October ita Board senden amenba mapang parnok jenjang tanaben asadangshitsü.