Onoki Dawood Ibrahim India-i anir arutsü: Anil Sinha

Delhi, December 13 (Agencies): CBI Director Anil Sinha-i India linüki kanga bushia aliba nisungtem rongnung ka, aser 1993 küm Mumbai nung bomb lendong agütsüba tongti asameyangsang, Dawood Ibrahim India-i meyipa anir arutsü, ta ashi.
Paisa, Dawood India-i meyipa anir arutsü atema CBI-i tajungtiba nung inyakdagi aser iba nungji takok angutsü imlar, ta ashi.
Tawa Indonesia nung telungpur tetsüdi, Chhota Rajan apuba sülen India linüki anir arua lir aser iba dak sentakba nung CBI Director-i, Chhota-i ano police matsüngdang menangzük (surrender), ta ashi.
December 01, 2015 nü Lok Sabha senden nung sorkari, Dawood ya Pakistan nung amenoka lir saka pai mapang-mapang shia pa aliba tesem melenshir, ta metetdakja liasü.
Lok Sabha senden nung Minister of State for Home, Haribhai Parthibhai Chaudhary-i, India-i mapang shia Pakistan ketdangsertem dang, Dawood-i kiralongraba atema obendangdak noktaktsü asoshi pa indang passport aser pa aliba tesemtem densema pa indang osangtem agüjang ta mepishir, ta metetdakja liasü.
Tamalen Union Home Minister, Rajnath Singh-i, Dawood India linüki meyipa anir arutsü atema akokba tashi ajak inyaktsü, ta shia liasü.