Onoki Delhi Police anema inyaktsü: Oomen Chandy

Thiruvananthapuram (Kerala), October 28 (Agencies): Bodhbar nü Kerala Chief Minister Oommen Chandy-i, Delhi Police-i Delhi, Kerala House nung nashi shi agütsür asü masü’ar ta mita reprangbaji aibelena inyakogo, ta parnok sasa tai menangzükra Kerala sorkari parnok anema noktaktsü, ta shiogo.

Cabinet senden ka amenba sülen osangbenertem den jembidang Chandy-i, Hombar nü Kerala House mita reprangba dak sentakba nung par sorkari Delhi Police dang nungi telangzüba atadar, ta ashi.

Chandy-i, Delhi Police-i inyakbaji tagizüktetla masü, ta ashi.

“Kerala sorkar jashibaji ni Ato kilonser Narendra Modi aser Home Minister Rajnath Singh na nema metetdaktsüogo,” ta pai ashi.

“Parnok (police) telangzübaji ni osangkaket nung nguogo, aser iba ama telangzübaji onoki magizüktsü,” ta paisa ashi.

“Onoki ano mapang tatsüka atatsü, parnoki parnok tai menangzükra, onoki ozüng ajanga mera agitsü,” ta pai ashi.

“Delhi Police-i inyakbaji Centre aser state tesentaktep akhümtsübu masüba lir,” ta paisa ashi.

“Police-i onok yiruja kechi inyakogo, ibaji inyaktsü parnok dak temeten mali,” ta chief minister-i ashi.

Congress lenir tain-isa, “Delhi ozüng nung nashi shi mamshitsüla ta asübaji tangbo jangjaogo. Ajisüaka jang shi nungbo tenokdangba mali. Temzüng agi melaba tashibo onoki Kerala House nung jang shi amshitsü,” ta paisa shisem.

Hombar nü Delhi Police ketdangser 20 shii Kerala House mita repranga liasü, ajisüaka Delhi Police-ibo ibaji mita reprangba masü aser parnoki aibelen kecha meinyak, ta shiogo.

You must be logged in to post a comment Login