Onoki Gau Rakshak-i inyakba mapatem pu-masemer: Centre

New Delhi, July 21 (Agencies): Hokolbarnü Centre sorkari Supreme Court dang, nashi kümzükba tenüng amer Gau Rakshak teloki ozüng alema inyakba mapatem sorkari pu-masemer, ta metetdaktsü.
Sorkar tenüng nung Solicitor General, Ranjit Kumar-i Justice Dipak Misra, Justice A.M. Khanwilkar aser Justice Mohan M. Shantanagoudar nunger bench dang, “Gau Raksha tenüng amer ozüng alema inyakba mapatem onoki pu-masemer,” ta metetdaktsü.
Centre sorkari, iba onük atema inyaktsüji state tem mapa lir, kechiyong temzüng ozüng azüoktsüji state sorkar mapa lir, ta ashi.
Iba dak sendakba nung state kar dang nungi telangzüba meshiogo, ajisüaka tang tashi nung state tem jagi telangzüba agüja mali.
Ibayongji Supreme Court-i iba ken o khen atema thinena telangzüba agütsütsü atema parnok nem hopta pezü mapang agütsüogo.
Pune nung alir meimchir temeten atema inyaker, Tehseen S. Poonawala-i temepishiba ka agütsüba ken o ka Court-i angadanga liasü.
Temepishiba shidi nungji, pei sasa Gau Rakshaks kümer nashi kümzükba tenüng amer nisung tepsetba atema temerenshi agütsütsü mepishia lir.