Onoki maneni takok angutsü: Mukul Sangma

Shillong (Meghalaya), October 13 (Agencies): Meghalaya Chief Minister, Mukul Sangma-i, taruba küm state assembly election nunga Congress Party-i maneni takok angutsü imlar, ta metetdaktsü.
Meghalaya nung kümsük abensaa Chief Minister inyaker kar rongnung pa densema lir.
Cabinet senden ka amenba sülen osangbenertem den jembidang pai, “Ni tanga yimtenren party tem koba jenjang nung lir, iba osang nguogo. Ozü sorkar tashi itta lir,” ta ashi.
State nung National People’s Party (NPP) national tongti aser Tura MP, Conrad Sangma-i tawa, Chief Minister Sangma-i Ampati aser Songsak menden naprong nung tamakok angutsü ta jembiba dak sendakba nung Sangma-i, “NPP-i menden ishika nung dang takok angutsü. Parnoki taruba election nung menden aika mangutsü,” ta ashi.
Mukul-i Garo Hills district kübok Ampati constituency nungi takok ngua liasü aser iba constituency nung pa pusemertem tashi itta lir, ajisüaka taruba assembly election nungbo pai East Garo Hills district kübok Songsak nungi ang tokteptsü, ta osang angazüker.
Taoba assembly elections nung Mukul leniba nung Congress-i Garo Hills region nung takok junga ngua liasü.
Par sorkar aitsüba dak sendakba nung pai, election atonger, anungji iba ama taitsüba alibaji tim dang. “Election matongdang shibaibo maitsütsü? Iba nung ya kecha tasen ka mali,” ta paisa metetdaktsü.
Meghalaya nung sangküm küm tetenzüklen assembly election agitsü.