Onoki nangzükbatem inyaker: Tejaswi Prasad

Patna (Bihar), November 27 (Agencies): Hokolbar nü RJD tongti lenir, Lalu Prasad Yadav’er jabaso aser Bihar Deputy Chief Minister, Tejaswi Prasad Yadav-i, onoki tenangzükbatem inyaker, ta ashi.

Election mapang nangzükbatem atalokja yashi Chief Minister, Nitish Kumar-i sangküm (2016 April 1 nungi) nungi state nung yi meshismeshia nokdangtsü sangdonga liasü aser tanü-a, Bihar nung kibong ajak nem light connection angati agütsütsü sangdongogo, aser iba dak sentakba nung state yimtiba Patna nung osangbenertem den jembidang Tejaswi-i, “Bihar nung yi nokdangtsü Chief minister-i lemtetbaji onoki pelaa agizüker. Election mapang Bihar nüburtem dang nangzükba pai inyaker,” ta ashi.

BJP aija pai, “Grand alliance ya ‘Jumla Party’ ka masü, kechiyong onoki nangzübatem inyakogo,” ta ashi.

Paisa, mapa meinyaki nisungtemi pa ajurui marutsüla ta ashi.

“Onok ya mapa makaba nisungtemi longbangtsü atema masü saka mapa inyaktsü atema vote ajanga onok shimtet,” ta Tejaswi-i ashi.

Ano pa tedi aser Health minister, Tej Pratap Yadav-ia Patna Medical College & Hospital (PMCH) nung facility tem agi melung mesüi, state yimtiba nung mozüki tajungtiba nung shirangertemi teyari junga mangur, ta shiogo.

“Ni tekaraba nung PMCH semdanga yangji facility tem reprangdangtsü aser yangji service junga magütsüba atema doctor aser ketdangsertem nem temerenshi agütsütsü, ta shiogo.