Onoki NOTA vote agütsütsü: POKSSS

Sambalpur, March 31 (Agencies): Odisha nung aluyimertem tentet balalai akümba tentet Paschim Odisha Krushak Sangathan Samanwaya Samiti (POKSSS)-i, taruba elections nung NOTA votes agütsütsü atema aluyimertem ayongzüktsü, ta metetdaktsü.
Osang angazükba agi, anüdoklen Odisha nung aluyimer lakh 50 POKSSS nung züngsem lir.
POKSSS Convener, Lingaraj-i, “POKSSS lenirtem dang NOTA (none of the above) votes agütsütsü asüngdangogo. Congress, BJD aser BJP nem masü saka NOTA votes agütsütsü atema aluyimertem ayongdentsü,” ta metetdaktsü.
Pai ashiba agi, aluyimertem dang sentsüh atoktsü aser Swaminathan Commission-i benokba onüktem benshitsü atema aluyimertemi akhangba tongtibang onüktem paidoktsü atema KALIA aser PM-Kisan Samman Nidhi schemes tenzük.
BJP aser BJD napronglai aluyimertem ashioktsüogo, ta pai ashi.
Congress-a aija POKSSS-i, “Centre nung Congress-i aniba UPA sorkar aliba mapang 2004 küm Swaminathan Commission tenteta liasü, aser commission report ji 2006 küm agütsü,” ta metetdaktsü.
Iba report agütsüba sülen Congress Party sorkar küm 8 tashi liasü ajisüaka Congress-i Swaminathan Commission-i benokba onüktem mapa küma meinyak, ta Lingaraj-i ashi.
Yimtsüngtem nung yimtenren party balalai nüboyimba mapang nung aluyimertemi item tasüngdangba asüngdangtsü; aluyimertemi parnok dang nenoki 2014 küm nangzükba inyaker asü? ta asüngdangtsü, ta POKSSS Convener, Ashok Pradhan-i ashi.