Srinagar, Feb. 22 (Agencies): Deobarnü People’s Democratic Party (PDP) Tir, Mehbooba Mufti-i tebu aser asür, Mufti Sayeed indang nükjidongtem tenüng asangba den külemi Jammu & Kashmir nung lar party-i Bharatiya Janata Party den teloktep maraksatsü temaitsü kar sayuogo.
Taoba chief minister aser tebu Sayeed asüba sülen tang mezüng party nung inyakertem den jembidang Mehbooba-i, “Mufti-i kodanga yimtenren nung seplasepshi masü aser pai (Sayeed) agiba telemtetbatem nung tamang akar,” ta ashi.
Srinagar nung aliba party office nung party nung inyaker 200 shi den jembidang lai, “Ni Allah dak aser Mufti Sayeed sahib-i agiba telemtetbatem nung tamang akar, Jammu & Kashmir aser linük azükarutsüji asenok atema tongtibangba asütsü,” ta lai ashi.
Mehbooba-isa, Jammu and Kashmir nung yimjung lira lai chief minister inyaktsü melunga lir aser state-i India aser Pakistan linük na tsüngda apu latsür ka ama inyaktsü, ta ashi.
“Aji oda süra iba menden (chief minister) nung amenba jenjang alitsü” ta lai ashi.
BJP den lokteptsü atema telemtetba agiba dak sentakba nung Mehbooba-i, nüburtem jenjang ajungtsü atema aser state meloksatsü atema iba (lokteptsü melungba) ya tebui tenla agütsüba tuluka liasü, ta ashi.
“Modi ama tasatait aser vote jenti angur lenir kati Pakistan aser India na tesentakep ajungtsüsa telemtetba agitettsü ta Mufti-i amanga liasü,” ta Mehbooba-i ashi.
BJP lenirtem pusema PDP Tir-i, küm 10 tashi Manmohan Singh (taoba Ato kilonser)-i Pakistan-i onüa liasü saka pai aji oda meinyaktet, ta ashi.
“Vote aika ngutetba aser tasütait asüba yong Modi-i Lahore (Pakistan) nung süngo ajem aser Kashmir nung telungur rara laika Atal Bihari Vajpayee-i Pakistan semdang,” ta Mehbooba-isa ashi.
“Onoki New Delhi dak melung malemba ama parnoki onok dak kasa temelung malem. Iba melungmelemtep anentsü atema Mufti Sayeed-i iba telemtetba (BJP den lokepba) ya agiba ajanga tenla tulu agütsü,” ta lai ashi.
You must be logged in to post a comment Login