Onsara tashi tesa, Joko ojang Shiang/Purapujiang

~ S. T. Yapang. Lkr. Kohima.

Tir Yimyim September 22, Tapak 11 nung Ao Senden ajanga ‘Sangdonger’ ta sür Ao Oshi nung memdemba, tebilemba shidangbatem osangkaket nung masü, saka Ao Senden Literature Board (ASLB) nemsa agütsü nung tajungba asütsü ta ayongzükba nguogo, ya kanga menuarang ayongzüker, saka tangjia tim ta bilemer, aser shiri temetongshitsü shidir ibaji ASLB-ia nentaka reprangshitsü imlar.
Asen Aor odang tangari zülua aliba kaketa mezüngdangi peii bilembaji shitak ta sür oshioben indang aiben zülua angur, aser Telok/Mungdang/ASLB-i dang Ken Kaket/Osep amala yanglushitsü nungloktsürbo pei mashi sürnung tapi agi oshi tera melenshiba angur, item kuliji tsünglanglen zünga aludang tera shisema angutsü.
Shibai temelenshitsüji sayudir mesüra melenshidir pai/lai tangari zülua aliba nungji zülusemtsü mesüra melenshitsü lira aji tuteta ashitsüla, aser peii melenshiba kuliji tejangja agütsütettsüla. Küm jenti zülua aruba ojang tang tasen ka pai/lai nguteter ama ano karbo joko asen Ao oshi nung teret janga amshia alibatem pa/la mulungka agi zülumenji melenshidi ta kecha kuli maka sür ‘ya majung, ya tim masü’ ta züluba angur. Tashikar kari pai/lai pei mulungka agi oshiji melenshir, saka iba telangzübaji pa/lai magütsüteter, ibaji oshioben nung tebilemtsü onsara tulu, oda tetsüng teben leptoktsüba ama lir.
Nai melenshitsünüra mesüra naji teloki nungloktsüba, tatishitsü agi ASLB-i ne nem osep yanglutsü nungloktsü nung nai item memelenshidang tamasa Aor oshioben tsütsü melenshitsünüra Dr Clark-i adokba Ao Osep aser ABAM ajanga adokba Osep iba den ASLB-i adokba Tensenyim-1 item amala ya jungjunga züngdanger melenshitsüra, nai shidangbaji 99% tagila asütsü, saka tangar koba jenjang nung lir memeteti melenshitsü agibo aibelen timba aser tagitsü ishiba ta asütsü.
Asen Aor tia maka Nagalima nung mezüng tenük lapoka Laishiba aser ken kaket ajak pei tetsü oshi nung amshia Naga kin talisa anüdoklen aser asen kin temeket alir ajaki ama Ao zünga Ao sapua zülushia jembiba mapang ka liasü, saka idangji asenok zülumen meji aitsütepa rara dang raratep. Iba tashi mait mapang anülulen alirbo küprai süngmang ka chia ta jembi ama mesüra küra o azümongshi na asemtep ama to Tenyidie oshi kin ajak ayongsema oshi renlokjen renlokba ajanga tanü Nagalima nung par oshiji tematiba jenjang nung lir. Saka asen oshibo kechiba lujen alur, aser ano lujen alutsüar kuli kar tsünglanglen angutsü.
Ashiko, iba tia nung mali asübo Ao oshi ya Nagalima asemsü kümer anasü nung pei tetsü oshi küma kaketriju ajak nung agia lila kar, aser anülulen Tenyidie oshi ta wangshitepa lila, saka tia maka pei metetbaji tatem aser shingaia ashiba magitsü ta asüba nungi shingaia matsüngshinü nungji, ashiko ano memenui Mongsenera par balaka, Jungliria tang amshiba jaki tzüra matemerar ta pei pei jurila razüka aotsüsa ajurutsüa arentaka bilemer.
Ao Laishiba rangben meyiper adokba nung tongti shilem agir, W. Nokdenlemba-i züluba ‘Ao Baibel Meyipba Otsü’ aser I. Ben Wati-i züluba ‘Ao Laishiba Jurila Otsü’ nunga pa (W. Nodenlemba) Laishiba temeyipdak nunga süngla Ao oshi zülumen melenshijen melenshiba ajanga Laishiba meyipba nunga tetsükdaktsü adokba shia lir, iba mapang nungi tanü tashi aser tarutsü nunga Ao zülumen melenshijen melenshinürtem, aser osep nung kuli maka sür tapi agi zülumen melenshinür, aser peii zülumen melenshiba kuliji shiang asünung meshiteter pur takümji reprangdangra parnok timbaka kidang Ao mejembir, parnokji Ao sayuba school nung mazüng, English school nung dang zünga intet, ajidang masü Ao lima nunga süngla school mazüng, yamaji sür English den medemdanga Ao oshiji parnok jaki meyipshija benjatsüa aru, aser tang tanüa ibaji ataloka lir, ano memenui kangasa tuluka ataloktsü. Lutsütsübo mali, kechibasüra item maparen inyaker ajakji taa talang tashi agia inyakba masü, angati nübutsük den pei mapa jenti nemtoka yutsür pei rongsen lalua inyaker dang. Tanü Dimapur nung sendena jembitsüla ano asüng Mokokchung nung sendentsüla ta item ajak nungji pei talongtsü nung pei chitem tema bener senzütsüba dang, anungji nisung küma alir medeni asen oshioben tsütsü mesüra nüngtaknüngra ajak nung parnokji medeni moutettsü. Saka azüzüktepa inyaktsüba maparen kar nung pei bilembaji tatem ta asüba shisatsü tila ka ajanga parnok nübutsük den rongsen laluba yari tajangzük asen kini magishii arur.
Yamai masü asübo asen oshi ya alima nung temelatiba aser tebentettiba oshi süla, kechiyong ojang ishika nung dang asen oshi ya züluteter, aser ojang ka sülen kechi ojang arujar aji temetetdang. Ni tamalen khen lemsatepogo tali jangjashitsü asoshi tanüa tera lepshir, iba yaki asen oshi nung 99% dak tali ayimjemtsü, itemji yamai:
i. n aser r agi tenzükba dak alaka tena jakdang zülujang lira itemji a, e, i, o, u, ü dang alitsü. Tat: n = ana, nenok, intep, onok, nung, ozüng. r = per, par, pur, oro, anir, onür, r jakdang talila kaji p ojang kar nung alitsü, ibaji reprang.
ii. n sülen zülujang metenloka lira a, e, i, o, u, ü, g dang alitsü. Tat: ana, nenok, ni, nung, intep, tenüng…
iii. j sülen tetia item zülujang rongnung ya ka alitsü: a, e, i, o, u. Tat: jana, jenti, ibaji, benjong, junger…
iv. s sülen tetia a, e, o, u, ü pungu rongnung ya ka alitsü. Tat: sülen, sen, song, nisung, san…
v. t tejakdang zülujang lira a, e, i, k, m, n, o, r, t, u, ü. par terka rongnung ya ka dang alitsü Tat: tejakdang: ati, otet, tuit, toktep, nemtep, nentep, poktet, inyaknürtem, otettsü, tutet, meküt. Tesülen zülujang lira a, e, i, o, u, s, t par tenet rongnung ka alitsü: tajung, tutet, tizük, toktep, tulu, agütsü, otettsü…
vi. Olong koba nung t agi tembanga lir, iba jakdang i, e ana rongnung ya ka alitsü. Tat: tsüngset, mait. Ojang kar nung dang ü aser u alitsü akok aji; meküt, Ut…
i. z sülen teti ü alitsü. Tatishitsü agi: züngi, tzü…
ii. g jakdang n alitsü, ojang kar nung dang a alitsü Tat: agizük, agiang, agima, agütsü…
iii. ng jakdang zülujang lira par pungu rongnung ya ka dang alitsü: a, i u, o, ü. Tat: a-aniang, i-shinga, u-nung, o-asong, ü-züngi…
iv. Ts sülen tetia ü alitsü, Tsüngrem, tsüngsem…
v. Item zülujang yaki tembangba malitsü südi: c, d, h, j, l, s, w, z.
vi. Ao oshi nung amshiba= a, b, c, d, e, j, h, i, g, k, l, m, n, o, p, r, s, t, u, w, y, z, ü.
vii. Mamshiba= f, q, v, x. Saka item ojang pezü ya kanga apayua amshinüra tanüngba ojang koba asenoki amshia aru item rongnungji meputep adoka tayim tanar yimli tazüng menden nung aniok nungji yimpur chanu pei li nung senmang maka aküm ama akümtsü aser par ojang pezü yaki yimliji jireptsütsü.
Tawa tanü lanur kari Ao oshi mashi sürnung Ao oshi ya temesüng nunger zülujang A nungi Z tashi amshiba ojang dak amendaker poktetba ka ama bilema oshi melenshidi asüba angur. Iba den temesüng nunger zülujang A nungi Z tashi Ao oshi nung maliba asoshi jeba tebilemtsü akaba nübua ajurudangogo. A nungi Z tashi ajakji amshiba agi kechi tajangzük agütsür? Aser ano ü koda? Temesüng nunger oshi den medemdanga odi süra asen Ao nung ü malitsüla, saka nenoki Ao nung ü maden kodasür zülutettsü mesüra jembitettsü? Asenoki tera apua amshirba dangashi asen oshi ya temesüng oshi nung amendaker poktetba masü, mesüra English nungi meyipbaa masü. English nung number ta asüba tatsüba nung No ta zülua angutsü, yamaji Ao oshi ajak ama talangba nung zülumen balaka ano tatsüba akümdang balaka, shitaklen nungi züludang balaka meyipo arudang ano ojangji melena züluli ta alima nung tebenjatiba oshi küma aotsü menua mali, tatishitsü agi enok/ endok, meinok/ meindok. Kechiyong Ao mashirtemi züluyim tasen purateta English den medemdanga yanglutsü meranga aru, aser tanüa aji kasa dang, iba tongpangji anendaka lir. Ao oshi aser English na ya koba tambuar lipok otsütem ajanga bushidang nunga ashiko Ao oshi tambu asütsü südi, oda züluba nung amshir ano küm ishika dang asüba den purapuji onsara tali asüba agi asen oshi rajang alirba dang.
Ken Kaket nunga kasa iba tebilemtsü lir, tai bushir masüji ken kaket ajak lushia reprangshia mekazüka, saka ken atendang tenshiba ka shinür, ken züngdangba 286 nung ‘tangari na penzüdang’ ta liasü, saka tang tasenba nung ‘tangari na reprangdang’ ta melenshia lir, iba jaki kechi tajangzük agütsür? Ana ya tetezü kasa dang, saka ni ashitsü agi ‘reprangdang’ nungibo ‘penzüdang’ ta asübaji o tarukba. Ya pei ashiba/metetba tali shisangnüba ajanga iba ama ya adokba dang, tangari zülutsüa aliba mesüra asen Aor ajaki lirumedema jembia aliba ojang kasajisa amshira pa/la azüngba jenjang den meputeper aser ibaji melenshi nung dang pa/la shia metetbaji tali jangjatsü ta bilemba shisatsü agi asen oshi aser ken kaket ya rongsen aser nübu laluba den sütepa ainba mali. Ano küm ter metsü tsüngda yimya ka ama khen melenshitsü südi, idangji ‘tangari na ajidang’ ta melenshitsü imlatsüa atar, kechiyong yamaji asünung dang ken kaket mesüra osep yanglushir shia metetbaji nüburi jangjatsü ta asen nisung tangatetbaji südi. Ken kaket nung ken tasen inoksemba ya junger, saka tenshia aliba kentem nung ani sosar ama ojang jagi tetezü tulubo magütsür sür timbaka nung o tepungbaba dang melenshia penjaba ya majung.
Putu ka shi süia odaki asen Aor oshioben nung mongin kati yamaisa ashia asü “Asen Ao oshi nung Mongsener timba teka amuoka inyaksangshir anungji memenui Ao nung ya Mongsen oshi timba küma aotsü” idangji kümkümshitsü melena meyiper paji dang menütsüa asü, “Yiar matu malem o tejembi, Junglir o Junglir na süngla yim balala nungi adenshira pei yimer osü agi masü Jungli Mongsen angateteptsüsa osü tanükba koba ‘Ao oshi’ ta ajar ibaji jembiteper aser züluteper nung nai ashibaji tamakoktsü o” ta menütsü, saka tanü pai ashiba amaji ataloktsüa shingaia meteta mali.
Oshi kaji kar jurila meyong masüji Ao senso dang masü Ao oshi meimer ajaki metongshitsütsüji tim, ajisüaka tekalen ashi ama peii t tesapubaji ta sür d agia aliba ajak nung d melendi ta mesüra temesüng nunger oshi A nungi Z tashi zülumen ajak amshitsü meji kuli maka sür kasa nüngja ka nung kar nung f, kar nung p, kar nung b, kar nung v, ta melenyonga ao nung koda asütsü! Chipo nungi jakzükba olong ka nungi Funak aser Votsülen ta melenshitsü, kechiyong ponakji kong nungi poktet aser ibaji kechi nungi aru, aser iba den sentaktepba ojangji kwika lir aji taküm nung memetet aser jembiali mangashidang sür pei mulungka agi melenerba dang, chipo nung aliba tanak dang tatsüba agi ponak ta aja, sürnung kodasür fu poktet? ta Ao osep mesüra oshi ‘purateta’ yanglur dangji asüngdang nung parnoki aji kodanga melangzütettsü, anungji tepurateteri aser osep yangluri melangzütetra aji shibai langzütsü?
Oshioben nung mongin P. Renthy Jamir ajanga tamalen ‘purapitet’ indang kanga junga rasa shiogo, aser pai ashiba ama to ‘puratet’ mesüra ‘purapitet’ ajakji kasa dang aser ‘pura’ ta asübaji asen Aor yim kecha nunga tajunglen jembiba mangashi, oda lutsüba aser talila purapujiba tsütsü jembiba dang metet, saka item ajak ya mashiri zülu, kechiyong Ao o ashirji computer mashirtem aser leni maor, kecha memetetertem ama lia aru, shirnok kidang Ao mejembir, aser Ao sayuba school nung mazüng parnokji dang nisung küma mezünglen computer-ji parnoki dang amshitet asünungji parnoki maparen aika inyaka aodang Ao nung ‘tasen yanglutet/apitet’ ta akabaji memeteti ‘purapitet’ ya jungtisü ta bilemer inoka amshiba dang asütsü, aji kü tereprangtetba ka lir.
Jembidang aser züluyim nung temzüng ozüngbo maka, saka jembiyim ka lir, yangji aibelenyongbo senchimenji maka aser tezüluria kodang lemtetba, kechi ozüng nung zülua lir, ibajibo meshitettsü, saka item ajakji osüyim aser oshi tera dak sentaka lir, kechiyong itemji tebang o dang aser mungdang ka lia yamaji jembitsü ta renemba kecha maka, ajisüaka inyakyim nunga itemji reprangdangra jembiba den kasa angutsü, tashitsü agi tetsür tebur aremi ao mesüra ammangtsümang nung kidangi shilangdang tetsür tama südaktsür, iyongjiang jembidang ‘tetsür tebur’ ta jembir südi, ‘tebur tetsür’, ‘tambur tantsür’ ta Aori mejembir. ‘Züngi menti’, ‘Tzünglu aru/arur’ ta jembir, saka tanüasüng ‘menti züngi’ ‘tzünglu alur’ ta jembiba/ züluba yamala zünger mezüngma ngua arur, saka asen Aoribo kodanga yamaji mejembir, aser aji oyim den kasa mapa jakia kuli sayur, saka tanü item teratetji melemsateper.
‘Anishi’ ta zülua aruogo, saka ya ojang jaki tetezü junga magütsüteter, aser pei yimdak ‘anishi’ ta jembirji kangarabo mangur, ‘nüoshi/nüoshipak’, ‘inüshi’ ta amala jembirbo lir, yaa memenui ‘nüoshi/nüoshipak’ ta melentsü südi, aji kuli tejangja akaba zülumen asütsü aser aji shitak lir, saka ibaji asen Aor kija asoshi dang alitsü, Ao oshi ‘anishi’ ta ya Naga kini dang masü Tzümar aser tzüyim adena oa alirtemi dena jembir aser chinür. Zülumen aser jembiyimji melenshi nung taia süang shitaka süang, tanga kin jakibo ‘anishi’-ji dang asütsüji asen Aor balaka aser tangar ajaki jembiba/zülubaji balaka ta oshiji asen maden tangar meyong küma aotsü.
Tatemsa ya dang shinür, mapang ka ken kaket aser osep yanglushiba nung Mongsener timba asütsü akok, idangji Mongseneri par oshi inoksemnüa tatishitsü agi Ao nung meja ta zülu nung aji ajaki meteter, saka ken kaket aser osep yangluba luden nung Mongsener timba anungji parnoki telung nung jembiteper meja ta jembia alibaji melentsü meji fungza ta inoksemtsü, ano mapang ka Junglir timba asütsü idangji pei yimeri merangpong ta jembirji sür, perangpong agi merangpong melenba mesüra merangpong agi perangpong melenba, mesüra meja agi fungza melenba amala dangji oshi ainba ta ajatsü makok, saka ajakji tiyaksangnüba den oshi benjatsüba ta dang jatettsü.
Ao oshi mainba aser ken kaket nung ojang melenshijen melenshiba kuliji asenok ajakji metetogo, nisung kari sen jenti agir mapa meinyaki mali, mesüra taa talang tashi agia inyakba shinga mali, saka timtemji pei memetet sür tashiri ashiba maginür, pa/lai metetbaji tatem aser tangari ashiba ajakji tai ta asüba den ajak dang tashitak tulutibaji tangari zülutsüa akaba ojang/zülumen kasajisa amshira pa/laji mashi memetet ama akümtsü ta bilema pei shia metetba tali shisangnüba koba dang ‘tiyaksangba shisatsü’ ta asen Ao nung ajar iba jaki asen oshi, ken kaket ya lujen lua aru, melenpet melener ta ni ajangshia, ngua aruba nungi kuli tejangja agi lemsateper.