Onük ajak medenibo India den ken o mejembitsü: Pakistan

Islamabad, August 31 (Agencies): Pakistan linüki India-Pakistan onük ajak medenibo India den ken o mejembitsü, ta shiogo.
Tanü Pakistan Ato kilonser asoshi National Security & Foreign Affairs Advisor, Sartaj Aziz-i, Line of Control aser arrtsülen tensa mejungi liaka taruba hopta DG Rangers aser DG Border Security Force na tsüngda senden amentsü sentong lir, ta ashi.
Paisa, linük ana tsüngda onük ajak medenibo India den ken o jembi metenzüktsü, ta ashiba Radio Pakistan osang ajanga metetdaktsü.
Nija TV channel ka den jembiba mapang Aziz-i, taoba hopta New Delhi nung linük ana tsüngda National Security Advisor-level senden makatetbaji India-i jelia telatetba kar lateta ayuba ajanga lir, ta aitsüogo.
Pakistan lenirtemi Kashmiri separatist ajurua senden amentsü benokba aser Pakistan-i Kashmir onük süokba nung India-i memelungi liasü, ibayongji Pakistan-i NSA level senden thinenja liasü.