Onük jembi tenzükogo

Mapang talangka Nagaland nung yimsüsürtem adenshia yimten ken o lemtepba mangashidangi arur tan Honibar nü Ex-Parliamentarians Association of Nagaland ( Ex-PAN) purtemi Urban Local Bodies aser India temzüng Article 371 (A) dak keta aliba onüktem jembitsü senden ayongzüka jembiba jagi Naga nunger yimsüsürtemi yimten onük benoka jembitsü bilemtetogo ta pelaa bilemer. Alima nung tebilemtsü alibaji tesüngmangtsüka masü saka nübortemi ajuruba tebilemtsü indang yimten yimsüsürtemi mangu aser mangashi ama mejembibajiang tesüngmangtsüka lir. Aji oda, yimten yimsüsürtemi yimten tebilemtsü dak aketba onüktem benoka mejembibaji medical doctor-temi nisungtem timtemba tashidak indang mejembinüi toktsüba amai asütsü. Aji oda, nübortem tashidak wara agi timtemba mapang medical doctortemi iba tashidak akoktsü indang jembia anepalu mesüra nübortemji dang masü saka parnok aser parnok chirnurtem daka iba tashidakji atongtsü aser külemi takoksa aser tesama angutsü. Ibaji mesüka yimten yimsüsürtemi pei lima nung yimten aser lokti tebilemtsü paikaya lir ser nung tatar senden nung tejembitsü kecha maka ama tebilemtsü ken o kecha süoka mejembira, iba jagi tebilemtsü mali akümtsüba masü saka tuluba aser talilaang akümtsü aser iba jagi yimsüsürtemang talila nüken belemtsü aser takoksa tulu angutsü. Iba ama tensa tia aika  asenoki taoba mapangtem nung ajuruogo. Tashidak miimshiba agi shirangba aneptsü masü. Iba kasaji shirangba yimya indang jembi nungang tashidak putettsü aser tashidak putet nungang taneptsü mozü bushitettsü. Iba denji kasa yimten aser lokti tebilemtsü ya lir. Nübortem timtemba mangashitsü aser mangutsü merangba agi alima majungtsü saka nübortem timtemba tiaji tonga oagi reprangdanger yimten senden nung benoka jembira, külem shisatsü agi, item timtemtemji akoktsü lenmang bushitettsü. Tanü Naga nungertemi ajuruba yimten aser lokti tebilemtsü ya tulu aser tebenja saka makoktsülabo masü. Tang tashi nung tebilemtsü akoktsü melen tuluba kümdaktsübaji asenoki pei kija mesüra pei telok ajangzüktsü aser pei ajunglen asaa inyaktsü bilema inyakba ajanga lir. Aji oda, Naga yimten  tebilemtsü akoktsü bilemtsü melen election nung yimten nüjiso atema inyaker telokang ka teyari agia adoktsü meranga, madokdangyongi Naga yimten tebilemtsü tuluba kümdaktsüogo ta bilemdi. Tanü Nagaland nung Urban Local Bodies election magitetba ajanga India temzüng Article 371 A jembitsü nüngdak adoker. Aji oda, kodang Article 371 A jembidir 16 Point Agreement jembitsüsa akümtsü ta Nagaland dak aketba yimten ken o ajak temai adoka tatar senden aser lokti senden nung jembimesotsü. Ibaji Nagaland shirangba tashidak indang jembia taneptsü mozü bushitsü mapa tenzüker asütsü. Tatsüba agi, Nagaland nung Urban Local Bodies election magitetba ya Municipal aser Town council menüngdakba agia masü mesüra saru magütsünüba agi masü mesüra tetsürtem nem yimten nung shilem magidaktsünüba agi masü saka yimten yimsüsürtem o nübortem na tsüngda mangatettepba ajanga lir. Ibaji kibong nung ajaki tajung dang bilemer ser nung tsüraburtemi tanurtem dang angateta mashiba ajanga meputep adok amai lir. Atangji, tatar senden nung latetba ka nübortemi nunga ta ashitsüsa latetbaji tesüngmangtsüka lir. Ibaji tangar bendanger kar ajungbena aruagi lateta yutsür ao amai bilemtsüsa atalokogo. Aji oda, tatar senden nung latetba ka yimtak mamshitettsüsa süra tatartem jenjangji kong lir ? Iba kasaji state tatar senden nung latetba ozüng ka nübortemi magizüktetba ajanga mamshitettsüsa kümra, tatartem jenjangji kong alitsü ? Itemji jungjunga bilemdanga, yimten yimsüsürtemi tatar senden alidang aser malidang mapang ajak nung yimten ken o nübortem rongnung süoka lemsateptsüla. Tatar senden ya senotsü sentong yanglutsü kisüng atema akümba senden kabo masü. Ibai nübortem tebilemtsü aser nüngdak jembidak lir. Iba senden nung amenertemi iba khuret aser nüngdakji meteta jembipet jembitsüla. Yimten nüngdakji o agi jembir aser o jagi mapa akümer aser nübortem anisüngzüker.