Opang Jamir fashion nung ajemoker küm 10 jungogo

Yimpoksüi/November 09 (TYO): Aries Corps Café, Itanagar tesem nung Yimpoksüi 8, 2018 nü Naga nunger Supermodel Opang Jamir Metsubo, pa fashion modeling career nung ajemoka küm 10 ajungba nüngtem nung benjung agia liasü.
Iba benjungmung sentong nung pai sayuba student tem Mr. Arunachal 2018, Director- Northeast Glamanand Supermodel India & Miss Teen India, Amjad Khan, Karken Peter Lombi (Food Truck kibur) aser Mr Arunachal & Miss NEFA Arunachal, Chairman Jacky Taniya Budh nunger aruagi denogo.
Arishi küm 16 asündang, Fashion model Opang Jamir-i 2008 küm Yimpoksüi 8 nü DDSC stadium Dimapur nung ‘Get Gorgeous Angel Model Hunt 2008 Grand Finale’ sentong ramp walk nung mezüng shilem agia liasü.
Mokokchung ama jila tilaka nungi iba amala sentong tulu nung mezüng ramp walk shilem agiba mapang pai akamesüna aser shisabulua aitbatem bilemtetta lemsatepa liasü.
Ajisüaka, ramp walk aser modeling tsütsü nendaka shilem agiba ajanga pa tali dang tasüitshidaktsü aser ibaji ajanga International o National fashion week, sentong aser show sabangtem nung shilem agitsü atema maongka angu.
Modeling ya tajung aser tetokteper aika aliba mapa ka lir, kong tetsür model temi tuluba amokbanger lir, saka temulungtetba tulu aser kodanga temulung ilaa makümtsü tangatetba aliba ajanga iba industry nung nokdakteter, ta Jamiri ashi.
2008 küm Dimapur nung Mr. Spunk Model Hunt sentong nung Opang Jamir Metsubo-i Mr. Congeniality jenjang nung takok ngua liasü.
Iba den külemi Opang-isa – Leo club Dimapur nung Mr. Friendship 2010, Mr. Earth India 2011, Mister India International 2012 (Bangkok, Thailand nung 7th Edition Mister International 2012 sentong nung India tenüng nungi Opang-i shilem agia liasü) aser Northeast Best Male Model of the year 2017 sentongtem nung shilem agia takok nguogo.